Қазақстанда машина жасау қарқыны үдеп келеді: авто, теміржол және техника өндірісінде серпін бар

2025 жылдың алғашқы жартысында машина жасау саласы 11,1% өсім көрсетті. Саладағы жетістіктер мен алдағы жоспарлар үкімет отырысында талқыланды, деп хабарлайды Anyqtime.kz тілшісі Primeminister.kz сайтына сілтеме жасап.

Машина жасау – өңдеуші өнеркәсіптің негізгі секторы. Бүгінде бұл сала жалпы көлемнің 19%-ын қамтамасыз етіп отыр. Өсімге автокөлік, теміржол техникасы, ауыл шаруашылығы машиналары мен электротехника өндірісінің артуы әсер етті. Мәселен, компьютер, электрондық және оптикалық жабдық өндірісі бірден 1,7 есеге өскен.

Автоөнеркәсіп алға басты

Автомобиль жасау машина жасау көлемінің 41%-ын қамтиды. JAC, KIA, Hyundai және басқа да танымал брендтерді шығаратын екі ірі зауыт жұмыс істеп тұр. Биыл Алматы мен Қостанайда жаңа автозауыттар іске қосылады. Алматыда CHANGAN, Haval және CHERY брендтері өндірілмек.

2025 жылы 147 мыңнан астам автокөлік шығару жоспарланған. Алайда салада бұл көрсеткіштен де жоғары нәтижеге жетуге мүмкіндік бар. Рұқсат беру рәсімдерін жеңілдету арқылы өндіріс қарқыны арта түседі.

Теміржол техникасы – қайта жаңғыру кезеңінде

Теміржол машина жасау секторы жалпы көлемнің 13%-ын құрайды. Былтыр 125 локомотив және 2,7 мыңнан астам вагон өндірілген. Биыл Астанада «Stadler Kazakhstan» зауыты іске қосылды. Бұл салада оқшаулануды күшейтуге жол ашады.

Көлік министрлігі пайдалану мерзімі ұзартылған вагондарға шектеу қою бастамасын көтерді. Тиісті құжаттар дайындалып жатыр.

Электротехника мен тұрмыстық техника өндірісі артып келеді

Бұл сегмент жалпы құрылымның 9%-ын алып жатыр. Өткен жылы Қазақстанда 270 мыңнан астам тұрмыстық техника өндірілді. Биыл Samsung брендімен теледидар мен кір жуғыш машиналар құрастырылмақ.

Ауыл шаруашылығы техникасы – отандық өнім алда

Ауыл шаруашылығы машиналарын жасау 6%-ды құрайды. Қазақстанда бұл техниканы 10 кәсіпорын өндіреді. Жеңілдетілген лизинг арқылы ішкі сұраныстың 90%-ы өтеліп отыр.

Бірінші жартыжылдықта 4 мың трактор (+39,3%) және 441 комбайн (+64,6%) өндірілді. Жыл соңына дейін 10 мыңнан астам ауыл шаруашылығы техникасы шығарылмақ.

Вице-премьер Серік Жұманғарин машина жасау саласын экономиканың негізгі қозғаушы күштерінің бірі ретінде атап өтіп, оның тұрақты дамуын қамтамасыз етуді тапсырды.