Маңғыстауда жасөспірімдер төбелесі үшін ата-аналар жазаланды

Маңғыстау облысы Құрық ауылында жасөспірімдердің жаппай төбелесі тіркелді. Құқық қорғау органдары оқиғаға байланысты бұзақылық бабымен қылмыстық іс қозғады, деп хабарлайды Anyqtime.kz тілшісі Stan.kz сайтына сілтеме бере отырып.

Instagram желісіндегі 112_aktau парақшасында жарияланған видеоларда ондаған жасөспірімнің тас лақтырып, қолдарына таяқ алып төбелескені көрінеді. Екінші бейнежазбада жарылысқа ұқсайтын қатты дыбыс естіледі.

Маңғыстау облыстық полиция департаментінің мәліметінше, барлық қатысушылар анықталып, ата-аналарымен бірге полиция бөліміне жеткізілген.

«Кәмелетке толмағандарды тәрбиелеу жөніндегі міндетін тиісінше орындамағаны үшін олардың ата-аналары да әкімшілік жауапқа тартылды. Жасөспірімдердің барлығы профилактикалық есепке қойылды», – делінген ведомство хабарламасында.

Қазіргі таңда тергеу жүріп жатыр. Оның нәтижесінде қатысушылардың әрекетіне құқықтық баға беріледі.