Кәсіби білім жүйесі қайта қаралып жатыр

Қазақстанда еңбек нарығына қажетті мамандарды даярлау үшін кәсіби білім беру жүйесі түбегейлі өзгеруде. Жаңа кәсіптер, технологиялық өзгерістер мен демографиялық үрдістер осы процеске ықпал етіп отыр, деп хабарлайды Anyqtime.kz ақпараттық агенттігі Ukimet Telegram-каналына сілтеме жасап.

Еңбек және халықты әлеуметтік қорғау министрлігінің мәліметінше, алдағы орта мерзімді кезеңде Қазақстан экономикасына шамамен 3 миллион маман қажет болуы мүмкін. Қазірдің өзінде бұл сұраныстың құрылымы айқындалған: кадрларға деген ең үлкен қажеттілік — қызмет көрсету саласында, одан кейін көлік пен логистика, өнеркәсіп, ауыл шаруашылығы және құрылыс салаларында байқалып отыр.

Вице-министр Асқар Биахметовтің айтуынша, бұл деректер кәсіби стандарттарды бекіту, білім беру бағдарламаларын жаңарту, оқуға тапсырыс беруді жоспарлау және қайта даярлау жүйесін жетілдіру үшін өте маңызды. Оның пікірінше, цифрландыру мен демографиялық өзгерістерді ескеріп жұмыс істеу қажет.

Қазіргі таңда еңбек нарығының дамуымен қатар жаңа мамандықтар пайда болуда. Соның ішінде: әлеуметтік тьютор, дрондар операторы, киберқауіпсіздік инженері, цифрлық бедел менеджері, жасанды интеллект маманы секілді кәсіптер ерекше сұранысқа ие бола бастады.

«Біз кәсіби кадрларды жүйелі түрде дайындау үшін Ұлттық біліктілік жүйесін белсенді түрде дамытып жатырмыз. Бүгінде еңбек нарығында сұранысқа ие 7800-ден астам мамандықтың шамамен 4500-і кәсіби стандарттармен қамтылған», – деді вице-министр.

Сондай-ақ, білім беру жүйесі еңбек нарығына барынша бейімделуі үшін 11 мыңнан астам білім беру бағдарламасы жаңартылып, кәсіби стандарттарға сәйкестендірілуде.