Жетісу облысында «Таза Қазақстан» бағдарламасы аясында ұзындығы 17,5 шақырым болатын арық желісі салынады, деп хабарлайды Anyqtime.kz.
Аталған жобаның шеңберінде Ақсу ауданы Қапал ауылында – 2 шақырым, Ескелді ауданы Ақын Сара ауылында – 5,5 шақырым, Кербұлақ ауданы Талдыбұлақ ауылында – 2,6 шақырым және Талдықорған қаласында – 7,4 шақырым арық жүйесін жабдықтау жоспарланып отыр.
Жергілікті тұрғындардың айтуынша, бұл жаңалық ауыл халқы үшін үлкен қуаныш. Мысалы, Ақын Сара ауылының ақсақалы Нұртілеу Ибрагимов бұл бастаманы қолдайтынын айтып, өз пікірін білдірді:
«Ауылда тұрып жатқаныма елу жылдан асты. Кеңес кезінде кейбір көшелерде арықтар болған, кейін жойылып кетті. Енді қайтадан арық жүйесін салып, көшелерімізді көркейтіп жатыр. Бұл халық үшін өте пайдалы жұмыс», – деді ол.