Санитариялық авиация паркі жаңарды

Қазақстанда санитариялық авиацияның әуе паркі толық жаңартылып жатыр: ескі ұшақтар пайдаланудан шығарылып, орнына халықаралық стандарттарға сай қауіпсіз борттар келді, деп хабарлайды Anyqtime.kz ақпараттық агенттігі.

Министрліктің мәліметінше, паркті жаңарту жұмыстары аяқталу сатысында. Бұдан былай тозығы жеткен ұшақтар толықтай қатардан алынып, олардың орнын заманауи, қауіпсіздігі жоғары әуе кемелері басады.

Флотқа Bombardier Challenger CRJ200 реактивті ұшағы енгізілді. Бұл борт екі сертификатталған Spectrum Aeromed медициналық модулімен, оттегімен қамтамасыз ету жүйелерімен, тіршілікті қамтамасыз ету құралдарына арналған электрмен жабдықтау блоктарымен және кабинадағы ауа қысымын автоматты түрде сүзу және реттеу жүйесімен жарақтандырылған.

CRJ200 конфигурациясы 4 науқасты жатқызып, 35-ке дейін пациентті отырғызып қауіпсіз тасымалдауға мүмкіндік береді. Сондай-ақ 12-ден астам маманнан құралған трансплантологтар бригадасын жеткізуге және трансплантацияға арналған ағзаларды арнайы режимде апаруға бейімделген.

Мұндағы жоғары жылдамдық пен ұшу қашықтығы өңіраралық рейстерді жанармай құюсыз орындауға жол ашады. Бұл ең шалғай өңірлерден пациенттерді тез эвакуациялауға жағдай жасайды. Қазіргі заманғы авионика күрделі метеожағдайда да сенімді жұмыс істеуге мүмкіндік береді, ал пайдалану өнімділігі бүгінге дейін санитариялық авиацияда қолданылған ескі буын ұшақтарынан екі есе жоғары. Аталған борт шетелдің алыс елдерінен Қазақстан азаматтарын тасымалдауға да қолайлы.

Сонымен қатар «Қазавиақұтқару» мемлекеттік компаниясы медициналық авиация міндеттеріне пайдаланылатын 6 жаңа Ми-8 және Ка-32 тікұшағын, сондай-ақ 2 L-410 ұшағын сатып алды. Бұл техника санитариялық ұшулар ауқымын кеңейтіп, қатаң климат пен күрделі рельеф жағдайында маневр мүмкіндігін арттырады.

Жаңартылған авиапарк төтенше жағдайларда қауіпсіздік пен сапаның жоғары стандарттарын қамтамасыз етіп, науқастарды жеткізу уақытын қысқартады және жалпы денсаулық сақтау жүйесінің өмірді сақтап қалу әлеуетін ұлғайтады.

Өткен жылы санитариялық авиация борттары Астана мен Алматыдан 2 184 рейс орындады: оның 1 488-і өңірлерге ұшса, 12 рейс шетелге бағытталды.