Шілдеде жаңа көлік сатылымы рекорд жаңартты

2025 жылғы шілдеде Қазақстанда жаңа көлік сатылымы жыл басынан бергі ең жоғары деңгейге жетті: ресми дилерлер 20 165 автомобиль өткізді, деп хабарлайды Anyqtime.kz ақпараттық агенттігі Stan.kz сайтына сілтеме жасап.

Шілде қорытындысы былтырғы дәл осы аймен салыстырғанда 10,6%-ға, ал маусыммен салыстырғанда 3,9%-ға жоғары болды. Бұл – биылғы нарықтағы ең үздік айлық нәтиже. Сала ойыншыларының айтуынша, сұраныс тұрақты, ал жеткізілімдер ырғағы жақсарған.

Қазақстан автокөлік одағының дерегіне сәйкес, жыл басынан бері 125 034 жаңа көлік сатылды. Бұл өткен жылдың қаңтар–шілдесіне қарағанда 23,4%-ға көп. Сарапшылар мұны модельдер қатарының кеңеюімен және кредиттік құралдардың қолжетімділігімен байланыстырады.

Қазақстан автокөлік одағының президенті Анар Мақашева нарықта тұтынушы талғамына сай кең ассортимент қалыптасқанын атап өтті. «Шілдеде ең көп өткен 10 модельдің 8-і – отандық өндіріс. Қазақстандықтар сапасы жоғары әрі заманауи қауіпсіздік талаптарына сай болғандықтан жаңа көлікті таңдайды. Соған қарамастан, автопаркті жаңарту шараларын жалғастыру қажет», – деді ол.

Брендтер бәсекесінде шілдеде көшті Chevrolet бастады – 4 048 дана (+70,4% жылдық өсім). Hyundai 3 713 данамен (-14,4%) екінші орынға сырғып, үшінші сатыға 2 170 данамен Kia (+11,9%) жайғасты. Одан кейін Jetour – 1 321 дана (+26,7%) және Chery – 1 138 дана (-17%) келді. Бұл тізім нарықта қытай маркаларының да орнығып үлгергенін көрсетеді.

Ай ішіндегі ТОП-10 модель қатарында бірінші орында Chevrolet Cobalt – 3 417 дана. Одан кейін Hyundai Tucson – 1 211 дана және Kia Sportage – 955 дана. Төртінші-бесінші орындарды Hyundai Elantra – 695 дана және Hyundai Mufasa – 666 дана иеленді. Кроссоверлерге деген тұрақты сұраныс сақталып отыр.

Жеті айдың жиынтық нәтижесі бойынша Hyundai 27 931 данамен (+23,7%) бірінші орында. Екінші сатыда – Chevrolet, 17 354 дана (+67,7%). Үшінші – Kia, 13 489 дана (+0,2%). Төртінші және бесінші орындарды Jetour – 8 563 бірлік (+73,7%) және Chery – 8 453 бірлік (+5,5%) бөлісті. Бұл ретте отандық құрастыру үлесінің жоғары болуы нарықтың ішкі өндіріс арқылы өсуіне дем беріп отыр.