Жайықтағы демалысқа отбасы болып барып, отағасынан айырылған жалғыз басты ана мұңын шақты

БҚО-да 10 шілдеде Жайықта 13 жасар қызды құтқармақ болған екі мұғалім мерт болды. Марқұмның жақыны оқиғаның жайын баяндады, деп хабарлайды Anyqtime.kz ақпарат агенттігі Stan.kz сайтының дерегіне сүйеніп.

Батыс Қазақстан облысында суға құлап кеткен жасөспірімді құтқару кезінде екі азамат ажал құшты. Қаза тапқандардың бірі – Абай ауылында тұрған, 37 жастағы ағылшын тілі мұғалімі Қанат Шайхиденов. Екіншісі – Астанадағы Әбіш Кекілбаев атындағы BINOM мектебінің физика пәні мұғалімі Бекарыс Әминов екені нақтыланды.

Марқұм Қанат Шайхиденовтың досы Бекзат Сәбитовтің айтуынша, қайғылы оқиға отбасы демалысына ұласқан күннің соңына қарай орын алған. «Қанат өзі суға түспейтін. Балық аулағанды жақсы көретін. Сол күні де қармағын суға салып, жанұясымен жағалауда отырған», – дейді ол.

Оқиға болған маңда су тереңдігін ескертетін белгі қойылып, ағаш қада орнатылған. Соған қарамастан басқа отбасының 13 жастағы қызы абайсызда қауіпті аумаққа кіріп кеткен. «Алдымен Бекарыс Әминов, артынан қыздың әкесі суға секірді. Қанат та бөгелмей көмекке ұмтылып, екеулеп әкесін жағаға шығарған», – дейді Сәбитов.

Алайда өзен ағысы өте қатты еді. Қыз судың екпініне ілесіп, құтқармақ болғандарды да тереңге тарта бастаған. Дәл сол сәтте жағалауда тұрған жастар бірігіп, қызды жағаға шығарып үлгерген. Бірақ қауіп толық сейілмеді: «Бекарыстың жүрегі сол мезетте сыр беріп, денесі су бетіне қалқып шықты. Ал Қанатты ағыс ары қарай алып кетті. Әкесін аман алып қалуға тырысқан Қанат сол кемінде бірнеше сәтте қараусыз қалған», – деп еске алады марқұмның досы.

Сәбитовтің сөзінше, қорқынышты көріністің барлығы отбасылардың, соның ішінде Қанаттың жұбайының көз алдында болған. «Үлкені 14 жаста, аутист диагнозы қойылған. Қалғандары 11, 9, 4 жаста және 4 айлық сәбиі бар. Балалар жағада ойнап жүрген», – дейді ол.

Марқұмның жақындары мемлекеттік органдардың үнсіздігіне қапалы. «Төтенше жағдайлар министрлігі әлі байланысқа шықпады, ерлікпен қаза тапты деген мәртебе не марапат туралы хабар болған жоқ. Жергілікті әкімдік те хабарласпады», – дейді Бекзат Сәбитұлы. Оның айтуынша, отбасына шұғыл материалдық қолдау қажет.

Көмек көрсетемін дегендер үшін реквизиттер:
Kaspi: +7 778 126 89 41 – Айкумис Х.

Байланыс үшін:
+7 775 412 12 83 – Бекзат Сәбитұлы (досы).

Айта кетейік, бұған дейін БҚО-да суға батып бара жатқан қызды құтқару барысында екі мұғалімнің қаза тапқаны жайлы хабарлаған едік.