«Байға тиген сайын ұзататын салт жоқ»: Қызын ұзатқан Наркенже Серікбаева айтылған сындарға жауап берді

Жақында ғана қызын ұзатып, қуанышын бөліскен дәстүрлі әнші Наркенже Серікбаева әлеуметтік желідегі сынға жауап берді. Бұған дейін кей желі қолданушылары бұрын тұрмыста болған қызын ұзатқанын айтып, әншінің әрекетін талқыға салған еді. Серікбаева бұл қадамды саналы түрде, перзентіне деген ықылас-ниетпен жасағанын мәлімдеді, деп хабарлайды Anyqtime.kz ақпарат агенттігі Skifnews.kz сайтына сілтеме жасап.

Әлеуметтік желілерде «Ажырасқан қызын қайта ұзатуға қазақ ұялмайтын болды», «Байға тиген сайын ұзататын салт жоқ», «Екінші рет ұзатпайды, тек орамал ауыстырады» деген мазмұндағы пікірлер желіде жиі кездескен. Кейбір оқырман «Қазақы салт бұзылды» деп айыптаса, енді бірі әр отбасының өз шешімі барын айтып, бейтарап көзқарас білдірді.

Наркенже Серікбаева өз парақшасында көпшілікті сабырға шақырып, қуаныш үстіндегі ниетін түсіндірді. «Кешелі бері біздің үйдің қуанышы әлеуметтік желіні жаулап, жақсы-жаман пікірлер толастамай жатыр. Өсекке емес, өсиетке терең болған елміз ғой, қашанда жақсы ойда, жақсы ниетте, жақсы тілекте болайық!» — деді ол.

Әншінің айтуынша, қызы Жансая «Шырайлы Шымкенттен, Жазиралы Жаркентке» ұзатылған, ал аналық жүрекпен шығарып салу — көптен бергі арманы болған.

«Қимастықпен шығарып салдық. Толқыдық, жыладық, қуандық… Жаныңның бөлшегін жат ұяға қиып беру оңай емес. Дегенмен жастар бір-бірін ұнатып, білек ұстасқан соң батамызды бердік. Қызымды дәл осылай ұзатамын деп армандадым, ниет еттім. Мен ұзатқан қыздар қайтып келмеген», — деп түйіндеді дәстүрлі әнші.

Оның сөзінше, шешімнің түпкі өзегі — жас жұбайлардың жарасымы мен ата-ана батасының салмағы.

Қоғамда қыз ұзату рәсіміне қатысты түрлі ұстаным бар екені жасырын емес. Бірі екінші рет ұзату жөн емес десе, енді бір топ «әр өңірдің салт-дәстүрі, әр әулеттің таңдауы бөлек» деген пікірде. Бұл оқиға да соның айғағы: көпшілік сынға алғанымен, өз қуанышын өз жолымен атап өтуге әр отбасының құқығы бар екенін алға тартқандар аз болмады.