«Қазақтың салтын бұздыңдар-ау»:  Үш баласы бар әйел өзінен жас жігітке ұзатылды
Фото: коллаж Sn.kz

«Қазақтың салтын бұздыңдар-ау»: Үш баласы бар әйел өзінен жас жігітке ұзатылды

Желіде маңғыстаулық блогер Несібелі Ахметқызы өзінен 5 жас кіші жігітке ұзатылып, той сәттерін жариялады. Оқиға көпшіліктің қызу талқысына түсті, деп хабарлайды Anyqtime.kz ақпарат агенттігі Skifnews.kz сайтына сілтеме жасап.

Блогер жариялаған бейнежазбада үй іші мен екі жақтың құдалық рәсімі көрсетілген. Несібелі Ахметқызы бұл күнді «ерекше, жүрек толқытар сәт» деп сипаттап, «сырға салу – тек сән-салтанат емес, екі жақтың туыстық байланысы мен сенімінің белгісі» екенін атап өтті. Ол алда үлкен той күтіп тұрғанын, қуанышты бөліскен жандарға алғыс айтатынын жазды.

Әлеуметтік желі қолданушыларының пікірі екіге жарылды. Бір бөлігі «алдыңғы некеде махаббат болмаған соң, бақытын қайта табуы заңды» деп қолдау білдірді. «Балаларына жақсы әке болса болды, жастың үлкен-кішісі маңызды емес» деген пікірлер де бар. Тағы бірі «өмірдің екінші мүмкіндігін бағалай білудің өзі ерлік» деп жазды.

Ал қарсы пікір білдіргендер қазақы салт-дәстүр тұрғысынан сынады. «Байға тиген сайын ұзатпайды», «сырға салу – алғаш рет тұрмысқа шығатын қызға тән» деген уәждер айтылды. Кей пікірде «дәстүрдің мәнін сақтай отырып, қазіргі заманның өзгерістерін ескеру керек» деп сабырға шақырды.

Несібелі Ахметқызы – үш баланың анасы. Жаңалықтың жариялануы оның жеке өміріне қатысты қызу талқыларды күшейтті. Әзірге блогер қоғамдағы сын-пікірлерге кеңінен жауап бермеді, алайда жарияламаларынан өз шешіміне сенімді екенін байқауға болады.