Қазақ баспасөзінің беделді қаламгері 53 жасында қайтыс болды

Белгілі журналист, қазақ баспасөзінің белді өкілі Айгүл Аханбайқызы 53 жасқа қараған шағында көз жұмды. Қоғам мен әріптестері құрметтеген қаламгердің өмірі мен еңбек жолы қазақ журналистикасында айрықша із қалдырды, деп хабарлайды Anyqtime.kz ақпарат агенттігі.

Айгүл Аханбайқызы 1972 жылы Жетісу облысы, Ақсу ауданына қарасты Ойтоған ауылында дүниеге келген. Алғашқы білімін Ілияс Жансүгіров атындағы орта мектепте алып, кейін Алматы қаласындағы Ғабит Мүсірепов атындағы №86 қазақ орта мектебін тәмамдады. 1990–1995 жылдары әл-Фараби атындағы Қазақ ұлттық университетінде журналистика мамандығы бойынша білім алды.

Еңбек жолын студент кезінен Алматы облыстық «Жетісу» газетінде тілші болып бастады. Кейін «Жас Алаш», «Қазақ әдебиеті», «Айқын», «Халық сөзі», «Егемен Қазақстан» секілді республикалық басылымдарда қызмет етті. Осы редакцияларда бөлім редакторы, бас редактордың орынбасары сияқты жауапты лауазымдарды атқарып, талай жас журналистке үлгі болды.

Айгүл Аханбайқызы мәдениет саласына да үлес қосты: М.Әуезов атындағы Қазақ мемлекеттік академиялық драма театрының баспасөз қызметінде менеджер болып еңбек етті. Қаламгер еңбегі бағаланып, «Ақпарат саласының үздігі» төсбелгісімен марапатталды, сондай-ақ «Құрмет» орденінің иегері атанды. Бұл марапаттар оның кәсіби биігін, қоғам алдындағы еңбегін айғақтайды.

Әріптестері мен оқырмандары оны талапшыл, әділ, ұстанымы берік журналист ретінде еске алады. Соңғы жылдары сырқатпен күресіп жүргені айтылды. Айгүл Аханбайқызының жарқын бейнесі мен жазғаны ұлт баспасөзі тарихында сақталып қалмақ.