Бұл жұмыс инклюзияны күшейтуге бағытталған ұлттық құжаттармен және бақылау тетіктерімен қатар жүруде, деп хабарлайды Anyqtime.kz ақпарат агенттігі ҚР Еңбек және халықты әлеуметтік қорғау министрлігі сайтына сілтеме жасап.
Ел көлемінде 2025–2030 жылдарға арналған инклюзивті саясат тұжырымдамасы, «Amanat» партиясының 2023–2027 жылдарға арналған жол картасы және Президент тапсырмасымен әзірленген «Халықпен бірге» жобасы іске асуда. Жол картасына сәйкес, интерактивті қолжетімділік картасына енгізілген нысандардың кемінде 20 пайызы жыл сайын бейімделуі тиіс: 2023 жылы – 20%, 2024 жылы – 40%, 2025 жылы – 60%, 2026 жылы – 80%, 2027 жылы – 100%. Қазіргі таңда республика бойынша 23 611 нысан толық бейімделіп үлгерген.
Солтүстік Қазақстан облысында бүгінгі күнге 909 нысан адамға қолжетімді форматқа келтірілді. Жоспар бойынша 2025 жылдың соңына дейін өңірде 931 нысан бейімделмек. Бұл бағыттағы жұмыстар әлеуметтік инфрақұрылымның қолжетімділігін арттырып, тұрғындардың қызметтерді кедергісіз пайдалануын қамтамасыз етуге бағытталған.
«Қазір ауруханаларға бару да, спортпен айналасу да, белсенді өмір сүру де бұрынғыдан әлдеқайда жеңіл болды. Бұл біз үшін өте маңызды, себебі қоғамның толыққанды мүшесі болып сезінуге және артық кедергілерге тәуелді болмауға мүмкіндік береді», – деді Петропавл тұрғыны, II топтағы мүгедектігі бар Арман Ахметов.
Бұдан бөлек, СҚО бойынша халықты әлеуметтік қорғау саласындағы реттеу және бақылау комитетінің департаменті 2025 жылдың басынан бері профилактикалық бақылау шеңберінде 14, жоспардан тыс бақылауда 26 тексеру жүргізді. Нәтижесінде анықталған кемшіліктерді жою туралы 23 нұсқама берілді. Алғаш рет анықталған бұзушылықтар үшін объект иелеріне әкімшілік айыппұл салынбайды, тек нұсқама енгізіледі; егер ол белгіленген мерзімде орындалмаса, айыппұл қолданылады.