Кредиттерді мерзімінен бұрын өтеу: 31 тамыздан бастап жаңа норма күшіне енеді

Қазақстанда кредитті мерзімінен бұрын өтеу қағидалары өзгереді: жаңалықтар 2025 жылғы 31 тамыздан бастап күшіне енеді. Қаржы нарығын реттеу және дамыту агенттігі (ҚНРДА) қарыз алушыларға негізгі талаптарды түсіндірді, деп хабарлайды Anyqtime.kz ақпарат агенттігі KAZ.NUR.KZ сайтына сілтеме жасап.

Кредитті жоспарланған мерзімнен ерте жабу артық пайыздық төлемді қысқартып, борыштан жылдамырақ құтылуға көмектеседі. Сондай-ақ бұл қадам кредиттік тарихқа оң әсер етеді. Өтеу екі түрде болады: толық өтеу (берешекті толық жабу) және ішінара өтеу (жоспардан тыс қосымша төлем енгізу). Ішінара төлегенде не ай сайынғы төлемді сақтап, мерзімді қысқартуға, не мерзімді сақтап, ай сайынғы төлемді азайтуға болады.

Банк ережелері заңнама аясында өздігінен бекітіледі. Қаржы ұйымы ең төменгі қосымша төлем сомасын, өтініш қабылдау мерзімін және қаражаттың есептен шығарылатын күнін белгілей алады. Ипотека бойынша ауыртпалықты алу тәртібі мен сақтандыру сыйлықақыларының қалдығын қайтару мәселесін де банкпен алдын ала нақтылап алған жөн.

Айыппұлдарға қатысты норма түбегейлі өзгереді. Қазір банктер қысқа мерзімді қарыздарда алғашқы 6 айда, ал ұзақ мерзімді қарыздарда алғашқы 1 жылда мерзімінен бұрын өтеуге айыппұл қоя алады. 2025 жылғы 31 тамыздан бастап айыппұл санкциялары тек заңды тұлғаларға қолданылады, ал жеке тұлғалар кредитті кез келген уақытта ешқандай айыппұлсыз өтей алады. Бұл талап жаңа және бұрын жасалған барлық келісімшарттарға таралады, бірақ өзгерістер күшіне енгенге дейін төленген айыппұлдар қайта есептелмейді.

ҚНРДА кеңесі бойынша, мерзімінен бұрын төлем жасамас бұрын жеке қаржылық «жастықты» бағамдап алыңыз. Бос қаражатты басқа мақсаттарға (мысалы, жоғары пайыз әкелетін депозиттерге немесе қарызы қымбатырақ басқа міндеттемелерді жабуға) пайдалану тиімді ме — соны салыстырып көріңіз. Сонымен бірге банкке өтініш берудің тәртібі мен мерзімдерін сақтап, төлемнің нақты қай күннен бастап негізгі қарызға есептелетінін жазбаша растауды сұраңыз.