«Министрліктен хат келді»: Ырысбала Икрамбай тосыннан «қиындыққа тап болғанын» айтты

Танымал блогер Ырысбала Икрамбай өзіне қатысты тексеріс қайта басталғанын мәлімдеді. Ол Туризм және спорт министрлігінен ресми хат алғанын көрсетті, деп хабарлайды Anyqtime.kz ақпарат агенттігі ozgeris.info сайтына сілтеме жасап.

Блогердің айтуынша, таңертең поштасынан «жүргізіп жүрген іс-әрекетіне түсініктеме берсін» деген талаппен келген хатты көрген. Ол мұны күйеуінің туған күніндегі «тосынсый» деп атады. «Бұл – өздері бола алмай, бардың жетістігін көре алмайтындардың әрекеті», – деп жазды Ырысбала. Оның сөзінше, хат министрліктен ресми түрде жолданған.

Ырысбала өткен жылы да осындай тексеріс болғанын еске салды. Сол кезде ол Астанаға арнайы барып, барлық құжаттарын көрсеткенін айтады. «Жұмыстарымның заңды екенін дәлелдедім. Қорғаушысыз, адвокатсыз сотқа қатысып шықтым», – деп жазды ол.

Блогер өз ісіне қатысты кез келген сауалға жауап беруге дайын екенін жеткізді. «Сендер секілді өсекке ермеймін. Қайда жазсаңдар да, халықтың арқасында табысым артады. Әлі ұшақ та сатып аламын», – деп түйіндеді Ырысбала. Оқиға әлеуметтік желіде қызу талқыланып, пікірлер екіге бөлінді.