Президент «Конституцияға 30 жыл» мерейтойлық медалін бекітті: кімдер иелене алады?

Қасым-Жомарт Тоқаев Жарлыққа қол қойып, «Қазақстан Республикасының Конституциясына 30 жыл» мерейтойлық медалін бекітті. Марапат елдің конституциялық тәртібін нығайтуға үлес қосқан азаматтарға табысталады, деп хабарлайды Anyqtime.kz ақпарат агенттігі.

Жарлыққа сәйкес, медаль Қазақстан Республикасының Конституциясының үстемдігін қамтамасыз етуге, ел тәуелсіздігін нығайтуға атсалысқан тұлғаларға беріледі. Сондай-ақ қоғамдағы келісім мен тұрақтылықты сақтауға, азаматтардың конституциялық құқықтары мен бостандықтарын қорғауға еңбегі сіңген жандар да марапатталады. Конституционализм идеялары мен қағидаттарын қалыптастыруға және дамытуға ерекше үлес қосқандар осы атаулы награданы иелене алады.

Мерейтойлық медаль еңбек адамын да назардан тыс қалдырмайды. Құжатта жұмысшы мамандар, бюджет саласының өкілдері, өндіріс ұйымдарының қызметкерлері және басқа да азаматтар қамтылған. Бұл қадам қоғамның әр саласында адал қызмет етіп жүрген жандардың еңбегін бағалауға бағытталған.

Марапатқа лайық деп танылу – Отан, мемлекет және қоғам алдындағы ерекше еңбектің мойындалуы. Тиісті тәртіппен ұсынылған үміткерлердің еңбегі сараланып, медаль табысталады. Бұл бастама мерейтой жылы азаматтық жауапкершілік пен құқықтық мәдениетті күшейтуге серпін бермек.