Қытайдың танымал Сhina Daily газетінде Тоқаевтың мақаласы жарық көрді. Мақалада не айтылды

Бүгін Қытайдың ағылшын тіліндегі танымал China Daily басылымында Президент Қасым-Жомарт Тоқаевтың «Strong Kazakh-Sino ties key to successful cooperation» атты мақаласы жарияланды. Онда Қазақстан мен Қытайдың жан-жақты стратегиялық серіктестігін тереңдету және ШЫҰ әлеуетін күшейту мәселелері қамтылған, деп хабарлайды Anyqtime.kz ақпарат агенттігі China Daily сайтына сілтеме жасап.

Мақалада мемлекеттер арасындағы сенімге негізделген тату көршілік байланыс пен жоғары деңгейдегі саяси диалогтың сабақтастығы атап өтіледі. Президент 2024 жылы екіжақты сауда көлемі тарихи ең жоғары деңгейге – 44 млрд долларға жеткенін, Қытайдың Қазақстандағы ең ірі сауда-экономикалық әріптес мәртебесін нығайтқанын жазады. 2005 жылдан бері қытайлық кәсіпорындар елімізге 27 млрд доллардан астам инвестиция құйып, шамамен 6 мың компания жұмыс істеп тұрғаны көрсетілген.

Автор көлік-логистикадағы түйінді жобаларға тоқталады: «Белдеу және жол» бастамасы аясында Еуразия жүрегіндегі Қазақстанның транзиттік рөлі арта түсті. «Орта дәліздің» (Транскаспий халықаралық көлік бағыты) жүк ағымын үздіксіз жеткізудегі маңызы, Достық–Мойынты учаскесіндегі қосымша теміржол желілерінің іске қосылуы арқылы Қытай–Еуропа дәлізіндегі өткізу қабілеті еселейтіні айтылған. Сондай-ақ Сиань қаласындағы ортақ сауда-логистика орталығы, Ақтау портындағы контейнер хабы және Ляньюньганмен әріптестік өңірлік байланыстылықты күшейткені көрсетіледі.

Энергетика мен агросектор да назарда: қазақстан-қытай мұнай құбырының кеңеюі, мұнай өңдеу және мұнай-химия нысандарын жаңғырту жобалары аталады. 2024 жылы Қытайға агроөнім экспорты 10 пайызға өскені, ал қытайлық инвесторлар көкөніс, дәнді дақыл, жүгері мен мақта өңдеуге қатысты ірі жобаларды қарастырып жатқаны баяндалған.

Мәдени-гуманитарлық бағытта 2024 жылғы «Қытайдағы Қазақстан туризмі жылының» табысты өткенінен кейін биыл «Қазақстандағы Қытай туризмі жылы» жарияланғаны еске салынады. Бұл бастамалар халықтар арасындағы өзара түсіністікті арттырып, туристік ағын мен бизнес байланыстарды жандандыруға серпін береді.

Тоқаев Шанхай ынтымақтастық ұйымының өңірлік қауіпсіздік, экономикалық ықпалдастық және гуманитарлық байланыстарды дамытудағы рөліне жеке тоқталып, ұйымның Қытай төрағалығы кезіндегі басымдықтары Қазақстан мүдделерімен үндес екенін айтады. Тяньцзиньде өтетін алдағы маңызы зор саммит ұйымның болашақ бағытын айқындап, ШЫҰ-ны «тұрақтылықтың өсіп келе жатқан тірегіне» айналдыруға мүмкіндік беретініне назар аударылған.

Материал Қытайға жасалатын сапар қарсаңында жарық көрді: 30 тамыз–3 қыркүйек аралығында Мемлекет басшысы Бейжің мен басқа да алаңдарда келіссөздер өткізіп, стратегиялық серіктестікті тереңдету мәселелерін талқылайды деген жоспар бар. Сарапшылардың бағалауынша, дәл осындай мазмұнды мақалалар алдағы келіссөздердің күн тәртібі мен үмітін айқындап береді.