«Жас жігіт тауып бер»: Атыраулық мұғалім мектеп «завучінен» зорлық көргенін мәлімдеді (ВИДЕО)

Атырау қаласындағы мектептердің бірінің бұрынғы қызметкері білім ордасы басшылығының өкілі өзіне күш көрсетіп, қылмыстық әрекетке барғанын жария етті. Оқиға жайлы видеодағы айыптаулар қоғам назарын аударды, деп хабарлайды Anyqtime.kz ақпарат агенттігі Alash.kz сайтына сілтеме жасап.

Автордың айтуынша, 2013 жылы №30 мектепке жұмысқа орналасқаннан кейін ол ұжымдық отырысқа қатысқан. Кеш мектеп директорының орынбасарының үйінде өткен. Сол түні өзін еріксіз жағдайда қалғанын, есінде тек дастархан басындағы сәттер ғана сақталғанын, ал таңертең жалаңаш күйде оянғанын айтады. Болжамынша, оған ішімдік ішкізілген.

Бұрынғы қызметкер кейін сол орынбасар тарапынан қысым көргенін, тіпті «үнемі жас жігіт іздеп жүретінін» айтып, жасөспірім ұлдарды тауып беруге мәжбүрлегенін мәлімдейді. Оның сөзінше, арада 12 жыл өткен соң үн қатуына негізгі себеп – сол кездегі орынбасардың бүгінде қаладағы басқа мектептің директоры болып қызмет атқаруы. Айыптауларға қатысты тұлғаның аты-жөні айтылмаған, ал фактінің ресми түрде дәлелденбегенін автор өзі де ескертеді.

Бұл ақпарат тарағаннан кейін Атырау облыстық Білім басқармасы ресми түсініктеме берді. «Әлеуметтік желілерде мектеп мұғаліміне қатысты жарияланған деректер бойынша Білім басқармасы тексеріс жүргізеді. Сонымен қатар, бұл ақпаратты жариялаған азаматқа құқық қорғау органдарына жүгініп, оқиғаны жан-жақты әрі әділ қарауға мүмкіндік беру ұсынылады», – делінген хабарламада. Басқарма құқықтық баға тек уәкілетті органдардың тергеп-тексеруінен кейін берілетінін атап өтті.

Құқық қорғау практикасында мұндай істер дәлелдемелерді мұқият жинауды, медициналық және психологиялық сараптамаларды, куәгерлердің айғақтарын қажет етеді. Сондықтан кейіпкердің шағымы бойынша процессуалдық шешімдер тергеу нәтижесіне қарай қабылданады. Кінәсіздік презумпциясы күшінде: айып тағылған тұлғаның кінәсі сот үкімімен ғана дәлелденеді.