«Көрген де арманда, көрмеген де арманда»: Қарағандыда шахтерлер күніне арналған мегаконцертке 120 мың көрермен жиналды

30 тамыз кешінде Қарағандының Тәуелсіздік алаңына бұрын-соңды болмаған халық жиналды. Шахтерлер күніне орай Qarmet компаниясы ұйымдастырған үлкен музыкалық шоу қала тұрғындары мен қонақтары үшін нағыз мерекеге айналды, деп хабарлайды Anyqtime.kz ақпарат агенттігі Stan.kz сайтына сілтеме жасап.

Сахнаға AYAU, SADRADDIN, «Ирина Қайратовна», сондай-ақ бұл өңірде алғаш рет өнер көрсеткен Zivert көтерілді. Мыңдаған адамның бірге қосылған дауысы мен эмоциясы алаңды толтырды. «Қарағанды, қайырлы кеш! Осынша көп көрермен алдында алғаш рет өнер көрсетіп тұрмын, шынымды айтсам, таңғалып тұрмын. Шахтерлер күнінің құтты болуын шын жүректен тілеймін», — деді Zivert сахнадан аймақ шахтерлерін құттықтап.

Алдын ала есеп бойынша, концертті 120 мыңнан астам адам тамашалаған. Бұл көрсеткіш Қарағанды тарихындағы ғана емес, елдегі ең ауқымды бұқаралық мәдени шаралардың бірі ретінде аталды. Ұйымдастырушылар қауіпсіздік пен логистикаға ерекше назар аударып, алаңға кіріп-шығу, дыбыс пен жарық сапасын үйлестіріп, үлкен ағынды көтере алды.

Концерт барысында «Ирина Қайратовна» тобы Qarmet компаниясының өндірістік жаңалықтарын атап өтті. «Газ келді, жігіттер! Теміртауда 80 жыл ішінде алғаш рет металлургия комбинатына табиғи газ тартылды. Бұл — өңір экологиясына оң әсер ететін маңызды қадам», — деп топ мүшелері сахнадан бөлісті. Әншілер Қазақстаннан тек жақсы жаңалық күтуге болатынын айтып, көрерменді мерекемен құттықтады.

Көрермендер үшін сый да қарастырылды: Qarmet жаңа Sony PlayStation 5 приставкаларын ұтысқа тігетінін хабарлады. Қатысу шарттары қарапайым: Instagram-дағы @qarmetpress ресми парақшасына жазылу, ұтыс туралы жазба астында екі досыңды белгілеу және концерттен stories не жарияланым салу. Нәтижелер 2 қыркүйекте компания парақшасында рандомайзер арқылы анықталатыны айтылды.

Кеш соңында Қарағандының түнгі аспанын отшашу жарқыратып, мерекенің әсерін ұзарта түсті. Бұл концерт тек мәдени шара емес, жер астында еңбек етіп жүрген шахтерлерге деген алғыс пен құрметтің, бірлік пен мақтаныштың айқын көрінісі болды. Qarmet-тің тартуы өңір тұрғындарын ортақ көңіл күйде біріктіріп, Шахтерлер күнін ұмытылмас жасады.