Халықтың 95 пайызы орысша сөйлейді. Бұл өзіміздің күшіміз — Абаев

Қазақстанның Ресейдегі елшісі Дәурен Абаев ТАСС агенттігіне сұхбатында елдегі тұрғындардың шамамен 95 пайызы орыс тілінде сөйлейтінін айтты. Бұл пікір қоғамда назар аудартты, деп хабарлайды Anyqtime.kz ақпарат агенттігі «Адырна» ұлттық порталына сілтеме жасап.

Елшінің сөзінше, орыс тілін жаппай білу – Қазақстан үшін «бәсекеге қабілеттілік беретін күш». «Біздің басымдықтағы тіліміз – мемлекеттік тіл, қазақ тілі. Оның рөлі жыл сайын артып келеді. Бірақ елде барлығының орыс тілін білуі – біздің артықшылығымыз», – деді дипломат.

Абаевтың айтуынша, Қазақстандағы 7 мыңға жуық мектептің шамамен 3 мыңында білім беру орыс тілінде жүргізіледі. Сонымен қатар, барлық мектепте орыс тілін оқыту міндетті екенін ерекше атап өтті. Ол орыс тілін меңгеру халықаралық коммуникация, білім және технологияға қолжетімділікті кеңейтетінін жеткізді.

Бұл мәлімдеме желіде қызу пікірталасқа ұласты. Бірі «қазақ тілінің салмағы артып жатқанда мұндай жоғары пайыз күмән тудырады» десе, енді бірі «екітілділік – еңбек нарығында нақты артықшылық» деген уәж айтады. Қоғам белсенділері ресми статистика мен нақты зерттеулерге сүйеніп сөйлеу керегін еске салып, тіл саясатына қатысты ашық талқылау қажет екенін ұсынды.

Тіл тақырыбы – қоғамдағы сезімтал мәселе. Мемлекеттік тілдің мәртебесін күшейту мен жаһандық коммуникацияға ашық болудың тепе-теңдігін табу – билік пен қоғам үшін ортақ міндет. Абаевтың сөзі осы теңгерімді қалай сақтайтынымыз жайлы жаңа сұрақтарды алға шығарды.