Күзгі шақырту басталды: жыл соңына дейін 22 мың жас сарбаз сапқа қосылады

Қыркүйектен бастап өңірлерде 195 қалалық және аудандық әскерге шақыру комиссиясы жұмысқа кірісті. Желтоқсанның 30-на дейін кейінге қалдыруға немесе босатуға негізі жоқ, 18-27 жас аралығындағы 22 мыңға жуық азамат Қарулы Күштер мен өзге де әскери құрылымдардың қатарын толықтырады, деп хабарлайды Anyqtime.kz ақпарат агенттігі.

ОКҚ алаңындағы брифингте ҚР Қарулы Күштері Бас штабының Ұйымдастыру-жұмылдыру жұмысы департаменті бастығының орынбасары Фархат Айдарбаев түсіндіргендей, мерзімді қызметке шақыру үдерісіне жергілікті атқарушы органдар тікелей жауап береді. Комиссия төрағалары болып әкімдердің орынбасарлары белгіленеді. Медициналық комиссиялар денсаулық сақтау органдары өкілдерінен жасақталып, шақырылушылардың әскери қызметке жарамдылығын тексереді. Ал қорғаныс істері жөніндегі департаменттер есеп жүргізіп, тізімдерді қалыптастырады, ІІМ өкілдері шақырудан жалтарғандарды іздеп, пункттерге жеткізуді қамтамасыз етеді.

Әскерді мерзімді қызметтегілермен жасақтау – қауіпсіздік, тұрақтылық және аумақтық тұтастықты сақтаудың негізгі тетігі. Мерзімді қызметтен өткендер қажет жағдайда жедел жұмылдырылатын әскери-оқытылған резервтің өзегін құрайды. Бұл — көптеген дамыған елдер қорғаныс жүйесіне ортақ қағидат.

Спикердің айтуынша, әскер ер азаматтарға тәртіп пен жауапкершілікті сіңіріп, бұйрықпен жұмыс істеу мен командалық өзара қимылды үйретеді. «Әскери қызмет азаматтық жауаптылық пен патриотизмді арттырып, елін қорғауға дайындығын нығайтады; ұлт тұтастығы мен қоғам үйлесімін қалыптастыратын маңызды тірек», — деді Фархат Айдарбаев.

Қысқасы, күзгі шақырту науқаны жоспарға сай жүріп жатыр: комиссиялар жұмысын бастады, медициналық тексерулер ұйымдастырылды, тізімдер жаңартылуда. Міндет — жас сарбаздарды сапалы іріктеп, бөліп-жармай тең жағдайда қызмет өткертуге жағдай жасау.