Мемлекет басшысы Астана қаласының әкімі Жеңіс Қасымбекті қабылдады

Мемлекет басшысы Астана әкімі Жеңіс Қасымбекті қабылдап, елорданың әлеуметтік-экономикалық және инфрақұрылымдық дамуы жөніндегі есебін тыңдады. Кездесуде инвестиция, білім беру нысандары және жылу инфрақұрылымын жаңғырту мәселелері талқыланды, деп хабарлайды Anyqtime.kz ақпарат агенттігі.

Әкімнің мәліметінше, биылғы жеті айда негізгі капиталға салынған инвестиция 1,2 триллион теңгеге жетіп, өткен жылдың сәйкес кезеңімен салыстырғанда 42,1 пайызға артты. Жалпы құны 300 миллиард теңгені құрайтын 55 инвестициялық жобаны іске асыру жоспарлы түрде жүріп жатыр. Бұл бастамалар 3,6 мың жаңа жұмыс орнын ашуға мүмкіндік береді.

Әлеуметтік инфрақұрылым бойынша: апатты үйлерді бұзу, тұрғын үй алаптарын дамыту, қаланы абаттандыру және көгалдандыру жалғасуда. «Келешек мектептері» ұлттық жобасы аясында 1 қыркүйекте 28 мың оқушыға арналған 7 жаңа мектеп есігін ашты. Осы оқу жылында тағы 15 мектеп пайдалануға беріледі; былтырғы кезеңде 66 мың орындық 24 мектеп, соның ішінде 16 «Келешек мектебі» іске қосылған. Жыл соңына дейін 4716 студентке арналған 8 жатақхана бой көтермек. Сонымен қатар 170 аула мен қоғамдық кеңістікті абаттандыру, 1 миллионнан аса жасыл желек отырғызу көзделген.

Жылыту маусымына дайындық шеңберінде үшінші жылу электр орталығының (ЖЭО-3) бірінші кезегі, сондай-ақ «Тұран» және «Оңтүстік-Шығыс» газ стансалары іске қосылып, қаланың жалпы жылыту қуаты 30 пайызға ұлғайды — қосымша 1100 Гкал/сағат өндіріс қамтамасыз етілді. Биыл «Тұран» стансасының екінші кезегін аяқтау жоспарланған, «Тельман» стансасының құрылысы жүріп жатыр. Бұдан бөлек, ЖЭО-2-ні кеңейту және «Оңтүстік-Батыс» газ жылу стансасын жобалау жұмыстары қолға алынған.

Кездесу қорытындысында Президент тұрғын үй-коммуналдық шаруашылығы мен әлеуметтік нысандарды алдағы маусымға мұқият дайындауды тапсырды. Сондай-ақ жаңбыр суын қабылдайтын кәріз жүйесін ретке келтіруді, жол-көлік инфрақұрылымындағы түйткілдерді жедел шешуді және абаттандыру жұмыстарын жүйелі түрде жалғастыруды міндеттеді.