Елімізде құрамында есірткі бар өсімдіктермен күрес қалай жүргізіледі

Қазақстанда 1 маусым мен 31 қазан аралығында құрамында есірткі бар өсімдіктерге қарсы «Қарасора-2025» кең ауқымды операциясы өтуде. Науқанның мақсаты – қарасораны өсіру, дайындау және таратуды тоқтату, сондай-ақ есірткі саудасын ұйымдастырған топтарды әшкерелеу, деп хабарлайды Anyqtime.kz  ақпарат агенттігі.

ҚР ІІМ Есірткі қылмысына қарсы іс-қимыл комитеті төрағасының орынбасары Қуандық Әлжановтың айтуынша, арнайы операция кезеңінде әлеуетті алқаптарда, соның ішінде баруы қиын аумақтарда күштер мен құралдар шоғырландырылады. Жұмыс үш сатымен жүргізіледі: дайындық (ұйымдастырушылық және қаржылық мәселелер), жедел-барлау және ақпарат жинау, әрі негізгі іс-шараларды өткізу. Әуе барлауына Ұлттық ұланның тікұшақтары жұмылдырылса, жетуі қиын өңірлерде тосқауыл қою мен жедел-іздестіру іс-қимылдары үздіксіз іске асады.

Үш айлық кезеңнің аралық қорытындысында 677 есірткі қылмысы тіркелді: соның 242-сі – өткізу фактілері, 220-сы – қарасора өсіру деректері. Заңсыз айналымнан жалпы 6 тоннадан астам есірткі, оның ішінде 2 тонна марихуана, 47 келі гашиш және 155 келідей синтетикалық зат тәркіленді. Сонымен бірге 3 тоннаға жуық каннабис өсімдігі мен 8,5 тонна прекурсор алынды; 9 есірткі зертханасы таратылып, 3 ұйымдасқан қылмыстық топтың (оның біреуі трансұлттық) қызметі тоқтатылды.

Оңтүстік өңірлер ерекше бақылауда. Жамбыл облысының 7 ауданында жабайы қарасора өскені белгілі аумақ 63 мың гектардан асады; Шу бойында «Дельта-Алқап» өңіраралық бөлімі жұмыс істейді. Қызылорда аймағы және оған іргелес Ақтөбе, Ұлытау, Түркістан облыстарының жекелеген аудандары да қауіп картасына енген. Соңғы жылдары Алматы мен Жетісу облыстарында да құрамында есірткі бар өсімдіктерді өсіру деректері тіркеліп отыр.

Жеткізу арналарына тосқауыл қою жұмыстары жүйелі түрде жүруде: жедел профилактика кезеңінде 34 арна, соның ішінде бір халықаралық канал тоқтатылды. Сонымен қатар спутниктік жүйелердің көмегімен күдікті учаскелер қашықтан зондталып, ондаған координат бойынша жердегі тексерістер жүргізіліп жатыр. Мұндай тәсіл жасырын алқаптарды ертерек анықтауға және «шикізат базасының» кеңеюіне жол бермеуге мүмкіндік береді.

Алдын алу және жою шаралары да қатар атқарылуда. Жамбыл облысында Ауыл шаруашылығы министрлігінің аумақтық бөлімшелері, прокуратура және жергілікті атқарушы органдармен бірлескен рейдтер нәтижесінде 5 мың гектардан астам аумақтағы жабайы қарасора оталып, жойылды. Мамандардың есебінше, осылайша каннабис тобының шамамен 1 мың тонна дайын есірткісі заңсыз айналымға жіберілмей қалды.

Операция жазғы-күзгі маусым толық аяқталғанша жалғасады. ІІМ дерегі бойынша, әуе барлауы, спутниктік мониторинг және жер үсті рейдтерінің ұштастырылған форматы есірткі бизнесінің жолын кесуге және жаңа алқаптардың пайда болуын тежеуге бағытталған.