«ҰШҚЫР ОЙ МЕН ШЕШЕН ТІЛ » САЙЫСЫНДАҒЫ - "БАС ЖҮЛДЕ"

Қазақстан халқының тілдері күні – ұлт бірлігін ұлықтап, мемлекеттік тілдің мәртебесін айқындайтын маңызды мереке. Осы атаулы күнге орай Абай облысының лингвистикалық орталығы «Ұшқыр ой мен шешен тіл» атты интеллектуалды ойын ұйымдастырды. Танымдық сайысқа облыстың Бородулыха, Бесқарағай, Көкпекті аудандары мен Курчатов қаласының тілдерді оқыту орталықтарының оқытушылары қатысты.

Зияткерлік ойын барысында қатысушылар қазақ тіл білімінің негізін қалаушы, ұлт ұстазы Ахмет Байтұрсынұлының өмірі мен шығармашылығына қатысты сұрақтарға жауап беріп, өз білімдерін сынға салды. Бұл арқылы сайыс тек танымдық сипат алып қана қойған жоқ, сонымен қатар ұлттық руханияттың алтын қазығына айналған тұлғаның мұрасын дәріптеуге бағытталды.

Интеллектуалды ойын нәтижесінде әрбір аудан мен қала арнайы номинациялармен марапатталды:

Бородулыха ауданы – «Алаш жұлдызы»,

Бесқарағай ауданы – «Тіл жанашырлары»,

Курчатов қаласы – «Парасат жолы»,

Көкпекті ауданы – «Рухани серпіліс».

Бұл атаулардың әрқайсысы – сайысқа қатысушылардың еңбегі мен көзқарасына берілген әділ баға. «Алаш жұлдызы» – тарихи рухтың жалғасы, «Тіл жанашырлары» – мемлекеттік тілге деген құрметтің белгісі. Ал «Парасат жолы» – даналыққа бастар соқпақ болса, «Рухани серпіліс» – ұлттық сананың жаңа қарқынын көрсетеді.

«Ұшқыр ой мен шешен тіл» ойыны – тіл мерекесінің айшығы ғана емес, қоғамның рухани әлеуетін арттыруға бағытталған маңызды шара. Мұндай танымдық бастамалар қазақ тілінің мәртебесін асқақтатып қана қоймай, өскелең ұрпаққа өнеге болып, ұлттық бірегейлікті нығайта түсетіні анық.

Абай облысында өткен бұл интеллектуалды ойын – тіл мерекесінің шынайы мазмұнын ашқан тағылымды басқосу. Ұлт ұстазы Ахмет Байтұрсынұлының өнегесі мен рухани мұрасын дәріптеу арқылы мемлекеттік тілдің абыройы артып, қоғамға серпін берген айтулы мәдени оқиға ретінде тарихта қалмақ.

"Абай облысы Бородулиха ауданының Мемлекеттік және басқа тілдерді оқыту орталығының" Директоры: Атаева Мейрамгүл Балабайқызы