Тоқаев Миннихановпен кездесті: Мәскеуге сапар алдында Қазақстан–Татарстан серіктестігі жаңа кезеңге өтеді

Қазақстан Президенті Қасым-Жомарт Тоқаев Татарстан Республикасының Раисы Рустам Миннихановпен жүздесіп, өңіраралық байланыстарды тереңдету мен бірлескен жобаларды кеңейту мәселесін талқылады, деп хабарлайды Anyqtime.kz ақпарат агенттігі.

Кездесуде Мемлекет басшысы Рустам Миннихановты қайта сайлануымен құттықтап, Қазақстан–Ресей қатынастарын нығайтуға және Қазақстан мен Татарстанның өзара тиімді серіктестігін ілгерілетуге қосқан үлесі үшін ризашылық білдірді. Тоқаев 12 қараша күні Мәскеуге жоспарланған мемлекеттік сапардың маңызын атап өтіп, екі ел ынтымақтастығын жаңа серпін беретін құжаттар топтамасына қол қойылатынын айтты.

Президент Миннихановтың Солтүстік Қазақстан және Қостанай облыстарына жасаған сапарын атап өтіп, Қазақстан аумағында кәсіпорындар ашу жоспарына қолдау білдірді. «Татарстанның Қазақстандағы барлық бастамасын қолдаймыз», – деді Қ.Тоқаев. Оның айтуынша, машина жасау, мұнай-газ химиясы және оған қажетті бөлшектер өндірісі бағыттарында табысты ықпалдастық қалыптасқан.

Мемлекет басшысы «КамАЗ» және «Татнефть» сынды жетекші компаниялармен бірлескен инвестициялық жобаларды басымдыққа айналдыру қажеттігін жеткізді. Бұл өндірістік кооперацияны күшейтіп, қосылған құны жоғары өнім шығаруды ұлғайтуға мүмкіндік береді.

Өз кезегінде Рустам Минниханов Қазақстанға шақырғаны үшін алғыс айтып, бизнес, өнеркәсіп, білім және мәдениет салаларындағы байланыстарды одан әрі ілгерілетуге дайын екенін растады. Ол татарстандық бизнес қауымдастықтың Қазақстан өңірлерімен нақты жобалар бойынша жұмысын жалғастыратынын атап өтті.