Тоқаев пен Тасмағамбетов кездесті: ҰҚШҰ Саммитіне дайындық пысықталды

Астанада Президент Қасым-Жомарт Тоқаев ҰҚШҰ Бас хатшысы Иманғали Тасмағамбетовті қабылдап, алдағы сессияға дайындық барысын талқылады, деп хабарлайды Anyqtime.kz ақпарат агенттігі.

Кездесуде биыл қараша айының соңында Қырғыз Республикасында өтетін ҰҚШҰ Ұжымдық қауіпсіздік кеңесінің сессиясына байланысты ұйымдастыру мәселелері баяндалды. Президентке дайындықтың негізгі кезеңдері жөнінде ақпарат берілді. Тараптар алда қабылданатын құжаттардың мазмұны мен олардың аймақтық қауіпсіздікке әсерін де саралады.

Әңгіме барысында Ұйым қызметінің басым бағыттары сөз болды. Олардың қатарында ортақ қауіп-қатерлерге қарсы іс-қимыл, серіктес елдер арасындағы үйлестіруді күшейту және көпжақты алаңдардағы өзара ықпалдастықты тереңдету мәселелері бар екені айтылды. Бас хатшы қабылданған жоспарлардың орындалуы мен мемлекеттер арасындағы диалогтың қарқынына тоқталды.

Кездесу қорытындысы бойынша Қазақстан тарапынан ҰҚШҰ аясындағы ынтымақтастықты жүйелі түрде ілгерілетуге дайындық расталды. Алдағы сессия қауіпсіздік күн тәртібіндегі бірқатар шешімдерді нақтылауға мүмкіндік береді деп күтілуде.