Осман Құраны, 114 көне кітап: Орталық Азия мен Әзербайжан көшбасшылары қасиетті ислам орталығына барды

Орталық Азия елдері мен Әзербайжанның мемлекет басшылары Өзбекстан астанасындағы Ислам өркениеті орталығына арнайы барып, мұндағы қасиетті жәдігерлермен танысты. Мемлекеттер басшылары ислам өркениетіне ортақ мұралар – Осман Құраны мен сирек қолжазбаларды тамашалады, деп хабарлайды Anyqtime.kz ақпарат агенттігі.

Президенттерге Ислам өркениеті орталығының құрылу мақсаты түсіндірілді. Орталық ислам өркениетінің маңызды бір тармағы саналатын Өзбекстанның бай мәдени-рухани мұрасын жүйелі түрде зерттеу және әлемге насихаттау үшін ашылғаны атап өтілді. Сонымен бірге мұнда сақталған қолжазбалар мен тарихи деректер аймақтағы ғылыми-діни дәстүрдің тереңдігін көрсететіні айтылды.

Қонақтарға ерекше назарға ұсынылған басты жәдігер – Осман Құраны. Сарапшылардың айтуынша, ол ислам тарихындағы аса құнды мұралардың бірі саналады және мұнда арнайы қорғау жүйесімен сақталады. Жәдігердің жан-жағына Құран сүрелерінің санына сәйкес 114 көне кітап орналастырылған.

Бұл кітаптар әр кезеңде жазылған діни, тарихи және рухани еңбектерді қамтиды. Олардың арасында Құран тәпсірлері, хадис жинақтары және аймақ ғұламаларының еңбектері де бар екені атап көрсетілді. Мемлекеттер басшыларына осы қолжазбалардың мазмұны мен шығу тарихы туралы қысқаша мәлімет беріліп, өңірдің ислам ғылымына қосқан үлесі туралы әңгімеленді.

Сапар барысында делегациялар Ислам өркениеті орталығын Орталық Азия мен Кавказ елдері арасындағы мәдени және рухани байланыстарды нығайтатын маңызды алаң ретінде дамыту мүмкіндіктерін талқылады. Көшбасшылар мұндай орталықтар жас ұрпақты тарих пен рухани құндылықтарды құрметтеуге тәрбиелеуде үлкен рөл атқаратынын атап өтті.