Қазақстанда орташа зейнетақы төмендеді: желтоқсандағы жаңа есеп жарияланды

Зейнетақының орташа мөлшері тағы да нақтыланды: Еңбек және халықты әлеуметтік қорғау министрлігі 2025 жылғы 1 желтоқсандағы деректерді жариялады, деп хабарлайды Anyqtime.kz ақпарат агенттігі Tengrinews.kz сайтына сілтеме жасап.

Министрлік мәліметіне сүйенсек, жыл басынан бері республикалық бюджеттен зейнетақы төлемдеріне жалпы 3 трлн 868 млрд теңге бағытталған. Соның ішінде базалық зейнетақыға 1 трлн 252,4 млрд теңге, ал ынтымақты зейнетақыға 2 трлн 615,6 млрд теңге бөлінген. Ал 2025 жылғы 1 желтоқсанда елдегі зейнеткерлер саны 2 млн 524 мың адамға жеткен.

Ресми ақпаратта «2025 жылғы 1 желтоқсанда жиынтық зейнетақының орташа мөлшері 142 669 теңге болды. Оның ішінде ынтымақты зейнетақы – 95 096 теңге, базалық зейнетақы – 47 573 теңге» деп көрсетілген. Бұл – ел бойынша орташа көрсеткіш, өңірлік айырмашылық пен еңбек өтіліне байланысты нақты төлем көлемі әр адамда әртүрлі болуы мүмкін.

Министрлік бұрынғы аймен салыстырғандағы деректі де келтіреді. 1 қарашадағы мәлімет бойынша жиынтық зейнетақының орташа мөлшері 142 744 теңге болған: ынтымақтысы – 95 167 теңге, базалық бөлігі – 47 577 теңге. Яғни қарашадағы көрсеткіш желтоқсандағы орташа деңгейден сәл жоғары болып отыр.

Зейнетақы тақырыбы биыл қоғам назарынан түскен жоқ. 8 қыркүйекте Қазақстан халқына Жолдауында Президент Қасым-Жомарт Тоқаев зейнетақы жинақтарының төмен деңгейін сынға алып, үкіметке зейнетақы жүйесіне қатысты тәсілдерді шұғыл қайта қарауды тапсырған еді. Бұдан кейін қазан айының ортасында Еңбек министрлігінде әлеуметтік-еңбек саласын дамыту мәселелері жөніндегі сарапшылар кеңесінің отырысы өтіп, ұлттық зейнетақы жүйесін реформалауға ұсынылған тәсілдер талқыланған.