АҚШ Ираннан кейін тағы бір елді көздеп отыр

Ақ үй Иранға қатысты әскери операция аяқталғаннан кейін АҚШ-тың келесі қадамы қандай болуы мүмкін екенін мәлімдеді. АҚШ президенті Дональд Трамптың айтуынша, Ираннан кейінгі келесі мақсат Куба болуы ықтимал, деп хабарлайды Anyqtime.kz ақпарат порталы.

Ақ үйдің мәліметінше, АҚШ бір уақытта екі әскери операция жүргізгісі келмейді. Сондықтан алдымен Иранға қатысты қойылған мақсаттарды орындау жоспарланып отыр.

Трамптың сөзінше, АҚШ бірнеше бағытта бір мезетте әрекет етуі мүмкін болғанымен, мұндай тәсіл әрдайым жақсы нәтиже бермейді.

«Біз бәрін бір уақытта жасай аламыз. Бірақ мұндай жағдайда жағымсыз жағдайлар орын алады. Егер тарихқа қарасақ, бәрін тым жылдам жасау көптеген мәселеге әкелген. Біз елімізде сондай жағдайдың болғанын қаламаймыз. Бірақ Кубада болып жатқан жағдай да таңғаларлық. Сондықтан алдымен Иран мәселесін аяқтағымыз келеді, ал Куба — тек уақыттың еншісіндегі мәселе», — деді Трамп.

Сонымен бірге АҚШ билігі Иранға қатысты операцияның нақты мерзімін немесе Кубаға байланысты ықтимал әрекеттердің уақытын әзірге жариялаған жоқ. Сарапшылар бұл мәлімдемелер халықаралық саяси жағдайды одан әрі шиеленістіруі мүмкін екенін айтып отыр.