Тоқаев пен Шахбаз Шариф жаңа Конституциядан кейінгі әріптестікті талқылады

Қазақстан Президенті Қасым-Жомарт Тоқаев Пәкістан Премьер-министрі Шахбаз Шарифпен телефон арқылы сөйлесіп, екіжақты байланыстар мен жаңа саяси кезеңнің маңызын талқылады, деп хабарлайды Anyqtime.kz.

Әңгіме барысында Шахбаз Шариф Қасым-Жомарт Тоқаевты Қазақстанда жаңа Конституцияны қабылдау жөніндегі республикалық референдумның сәтті өтуімен құттықтады. Пәкістан үкіметінің басшысы бұл шешімнің елдің мемлекеттік басқару жүйесін одан әрі күшейтіп, институционалдық тұрақтылықты нығайтуға және халықтың тұрмыс сапасын жақсартуға ықпал ететін тарихи қадам екенін айтты.

Сондай-ақ Пәкістан Премьер-министрі бүкілхалықтық дауыс беру нәтижесі қазақстандықтардың Президент бастамашылық етіп отырған саяси және әлеуметтік-экономикалық реформаларды қолдайтынын аңғартқанын атап өтті.

Өз кезегінде Қасым-Жомарт Тоқаев құттықтау сөздері мен референдум нәтижесіне берілген жоғары бағалау үшін Шахбаз Шарифке алғыс білдірді.

Тараптар Қазақстан мен Пәкістан арасындағы стратегиялық серіктестік тұрақты түрде дамып келе жатқанын атап өтті. Әңгіме кезінде осы жылдың ақпан айында Президенттің Пәкістанға жасаған мемлекеттік сапары аясында қол жеткізілген келісімдердің орындалу барысы да сөз болды.

Бұдан бөлек, екі ел басшылығы өңірлік және халықаралық күн тәртібіндегі өзекті мәселелер жөнінде де пікір алмасты. Бұл телефон әңгімесі Астана мен Исламабад арасындағы саяси диалогтың жалғасып жатқанын және өзара мүдделі бағыттар бойынша байланыс үзілмейтінін көрсетті.