Қарағанды бағытында жол бойында шаршап-шалдығып келе жатқан қарияны кездейсоқ жолаушы байқап қалып, жағдайын сұрап тоқтаған. Белгілі болғандай, қарт адамның көлікке отыруға мүмкіндігі болмаған – есепшоттары бұғатталып, зейнетақысын да ала алмай жүрген. Бұл туралы Anyqtime.kz тілшісі Skifnews.kz сайтына сілтеме жасап хабарлайды.
Қария жол жиегімен жалғыз өзі жаяу жүріп келе жатқан. Оның жағдайын алғаш болып байқаған – Түркістан облысы Әділет департаментінің басшысы Нұржан Махамбетов. Ол көлігін тоқтатып, қарияның не себепті ұзақ жолға жалғыз шыққанын сұрайды.
Белгілі болғандай, зейнеткердің есепшоттары микрокредит ұйымдарына қарызы үшін бұғатталған. Ал зейнетақысы – белгісіз біреулердің иелігінде. Ақшадан айырылып, көмек сұрайтын ешкімі болмағандықтан, ол Шымкенттен Қарағандыға дейінгі ұзақ жолға жаяу шығуға мәжбүр болған.
"Мұндай жастағы адамның жалғыз, шарасыз, ақшасыз жүргенін көру жүрекке ауыр тиеді", – деді Нұржан Махамбетов. Ол зейнеткерге көмек қолын созып, есепшоттарын қайта қалпына келтіруге ықпал еткен.
Махамбетов өз сөзінде: "Адамдар жайдан-жай жолықпайды: кейде олар сіздің өміріңізді өзгертеді, кейде сіз олардың өмірін өзгертесіз", – деп түйіндеді.