Жеке куәлік енді онлайн беріледі: Қазақстанда пилоттық жоба іске қосылды

Қазақстанда жеке куәлікті онлайн рәсімдеуге мүмкіндік беретін жаңа қызмет түрі іске қосылды. Бұл туралы Anyqtime.kz тілшісі Ішкі істер министрлігі мен Цифрлық даму министрлігінің бірлескен бұйрығына сілтеме жасап хабарлайды.

Жаңа бастама — мемлекеттік қызметтердің тиімділігін арттыруға бағытталған пилоттық жоба. Енді жеке куәліктің жарамдылық мерзімі аяқталған жағдайда құжатты үйден шықпай-ақ, eGov электронды үкімет порталы немесе eGov Mobile қосымшасы арқылы ауыстыруға болады.

Қандай жағдайда қолжетімді?

Бұл қызмет жеке куәліктің жарамдылық мерзімі аяқталуына 30 күн немесе одан аз уақыт қалған кезде, сондай-ақ мерзімі 10 күннен аспайтын уақыт бұрын аяқталған болса ғана қолжетімді.

Құжатты қалай рәсімдеуге болады?

- eGov.kz порталына немесе eGov Mobile қосымшасына кіріп, өтініш толтыру қажет;
- ЭЦҚ арқылы қол қойылады;
- Фотосурет арнайы форматта түсіріліп, өтінішке тіркеледі;
- Жүйе азаматтың тіркелуі мен суреттің талапқа сайлығын тексереді;
- Мемлекеттік баж салығын төлеу қажет;
- Өтініш мақұлданған соң, дайын куәлікті ХҚКО-дан алып кетуге болады.

Бұл өзгеріс 2026 жылдың 31 наурызына дейін пилоттық режимде жүзеге асырылады. Жоба сәтті жүзеге асса, болашақта бұл тәжірибе кең ауқымда қолданылуы мүмкін.