Кішкентай балалары бар ата-аналарға жұмыс кестесін икемді ету ұсынылды

Қазақстанда балалары бар ата-аналарға икемді жұмыс кестесін ұсыну көтерілді. Бұл ұсынысты мемлекеттік орган өкілдері ірі кәсіпорындармен кездесуде айтты. Бұл туралы Anyqtime.kz тілшісі Stan.kz сайтына сілтеме жасап хабарлайды.

Жастар және отбасы істері комитеті төрағасының орынбасары Лира Раисованың айтуынша, ата-аналарға балаларымен көбірек уақыт өткізуге мүмкіндік беру – қоғамның ортақ міндеті. Осыған байланысты жұмыс берушілерге түсіністік танытып, жұмыс кестесін ыңғайластыру, тіпті қажет болса, кәсіпорын маңынан балабақша ашу сияқты шараларды қарастыру ұсынылған.

«Біз жақында жұмыс берушілермен кездестік. Оның ішінде ірі кәсіпорын өкілдері де бар. Біздің ойымызша, жас балалары бар отбасылар үшін икемді кесте енгізу немесе жұмыс орны жанынан балабақша ашу мәселесі қаралуы тиіс», – деді Раисова.

Ұсыныстың өзектілігі әсіресе жаз мезгілінде арта түседі. Себебі, каникул кезінде балалардың көпшілігі үйде жалғыз қалады. Ал бұл түрлі күтпеген оқиғаларға себеп болуы мүмкін.

Сонымен қатар, шенеуніктер балалардың болашағына бағытталған бастамаларды да тілге тиек етті. Биыл «Ұлттық қор – балаларға» бағдарламасы аясында әр баланың арнайы шотына 129 доллардан аударылған. Бұған қоса, «Келешек» атты ерікті жинақтау жобасы жұмыс істеп тұр. Бұл бағдарламалар балаларға болашақта жоғары білім алуына немесе баспана мәселесін шешуге көмектесуі тиіс.