Талдықорғанда 16 жастағы Шерзат Болаттың өліміне қатысты атышулы іс бойынша сот процесі жарыссөз кезеңіне өтті. Судья Ержан Жанұзақов төрағалық ететін ашық сот отырысында мемлекеттік айыптаушылар өз уәждерін келтіре бастады, деп хабарлайды Anyqtime.kz тілшісі.
Айыптаушы Дана Сәрсенбай өз сөзінде қайғылы оқиғаның мән-жайын тағы бір мәрте тізіп берді. Ол Жоғарғы соттың нормативтік қаулысына сүйене отырып, бұл істі топпен жасалған бұзақылық деп бағалауға болатынын атап өтті. Прокурор бұзақылыққа бірнеше адамның қатысуы немесе рөлдердің бөлінуі маңызды емес екенін, бастысы — ортақ қылмыстық нәтижеге бағытталған әрекет екенін айтты.
Еске сала кетейік, 2024 жылғы 4 қазанға қараған түні Талғар қаласында 16 жастағы Шерзат Болат ауыр соққыдан қайтыс болған. Бұл қайғылы жағдай қоғамда резонанс тудырып, әділ тергеу талап еткен тұрғындар наразылыққа шыққан еді. Қайғылы оқиғадан кейін бірнеше күн өткен соң, марқұммен араздықта болған делінген Нұрымовтар отбасының үйі отқа оранып, Бас прокуратура өрттің қасақана жасалғанын растаған. Алайда бұл іске қатысты күдіктілер әлі табылған жоқ.
Қазіргі уақытта сотта ауыр қылмысқа қатысы бар деп Талғар ауданының тоғыз тұрғыны айыпталып отыр. Іс қазақ тілінде қаралуда.
- Абзал Шынасыл (2000 ж.т.) — қазақ, жұмыссыз, бұрын сотталмаған. Айып: ҚР ҚК 99-бап 2-бөлік (кісі өлтіру), 24-бап 3-бөлік (қылмысқа оқталу), 293-бап 3-бөлік (бұзақылық).
- Равиль Сакиев (1998 ж.т.) — қазақ, мейрамханада администратор болған, бұрын сотталған. Айып: 99-бап 2-бөлік (кісі өлтіруге оқталу), 24-бап 3-бөлік, 293-бап 3-бөлік.
- Шыңғыс Белгожаев — жоғары білімді, спорт мектебінде әдіскер, бұрын сотталған. Айып: 293-бап 3-бөлік.
- Дархан Әскентай (1993 ж.т.) — қазақ, жұмыссыз, бұрын тергеуге алынған. Айып: 293-бап 3-бөлік.
- Нұрқияс Ілиясов (1998 ж.т.) — қазақ, жұмыссыз, бұрын сотталған. Айып: 293-бап 3-бөлік.
- Азамат Тоқтаубаев (2000 ж.т.) — қазақ, кәсіпкер, үйленген, 2024 жылы 7 жылға сотталған. Айып: 293-бап 3-бөлік.
- Нұрбол Тоқтаубаев (1996 ж.т.) — қазақ, арнайы техника операторы, бұрын сотталмаған. Айып: 293-бап 3-бөлік.
- Дидар Қалиахмет (1998 ж.т.) — қазақ, жүргізуші, екі баласы бар, бұрын сотталмаған. Айып: 293-бап 3-бөлік.
- Думан Ысқақ (2007 ж.т.) — қазақ, 11-сынып оқушысы. Айып: 434-бап (ауыр қылмыс туралы хабарламау).