«Әжетханаға қамаған»: Тәрбиеші балабақшадағы балаларды ұрып-соққаны үшін айыпталуда

Ақтау қаласында үш жасар баланың ата-анасы өз ұлдарының балабақшада зорлық-зомбылық көргенін айтты. Баланың мінез-құлқы өзгергенін байқап, қатты дыбыстан қорқып, балабақшаға барудан бас тартқан соң, анасы 14 мамырда бейнебақылау камерасынан жазбаны тексеруді сұраған, деп хабарлайды Anyqtime.kz тілшісі Azattyq Rýhy сайтына сілтеме жасап

Камера жазбасында балабақша тәрбиешісінің баланы бірнеше рет ұрып, шымшып, зорлық-зомбылық жасағаны анық көрінеді. Тәрбиеші баланың басынан ұрып, оны әжетханаға апарып, қараңғы бөлмеде 20 минутқа қалдырған.

«Мен бұл адамның кішкентай балалармен жұмыс істемеуі үшін жұмыстан шығаруды сұрадым. Біз басқа балалардың қауіпсіздігін ойлаймыз. Қазір баламыз психиатр мен логопедке барып жүр. Біз үшін бұл өте қиын. Бала үлкендермен қарым-қатынас жасаудан қорқады. Дәрігерлер баланы басқа балабақшаға ауыстыруды ұсынды. Мұндайды ешкімге тілемеймін», – деп пікір білдірді баланың әкесі.