Шымкентте жеке балабақшадағы тәрбиеші балаларға зорлық жасағаны үшін ұсталды
Ақбота Сабырхан
Автор«Шымкентте жеке балабақшаның тәрбиешісі балаларды ұрды» деген күдікпен ұсталды, — деп хабарлайды Anyqtime.kz. Бейнебақылау камералары әйелдің екі сағат бойы балаларға қол көтеріп, оларды сүйреп жүргенін, жылағанына қарамастан ешқандай реакция көрсетпегенін көрсетті.
Ата-аналар балада көгерген іздерді байқап, балабақшаның жазбаларын тексеруді талап еткен. Бұл дерек бойынша полицияға арыз түсіп, қылмыстық іс қозғалды. Күдікті тергеу изоляторына қамалды, ал балабақша басшылығы тәрбиешіні жұмыстан шығарды.
Шымкент әкімінің орынбасары Сарсен Қуранбек оқиғаның барлық мән-жайы құқық қорғау органдары тарапынан анықталып, білім басқармасы тиісті шаралар қабылдайтынын хабарлады.
Айта кетейік, бұған дейін Батыс Қазақстан мен Ұлытау облыстарында да тәрбиешілердің балаларға қатысты зорлық-зомбылық фактілері тіркелген. Ұлытауда тәрбиеші қоғамдық жұмысқа сотталып, моральдық зиянды өтеуге міндеттелген.
