Неге 30 жастан кейін арықтау қиындайды?

Жас ұлғайған сайын адамдарға артық салмақтан арылу қиындай түседі. Артық салмақ баяу кетіп қана қоймай, тез жиналады. Мұның қарапайым себебін эндокринолог дәрігер Оксана Михалева түсіндірді: "Бәрі метаболизмнің (зат алмасудың) баяулауынан болады", – деп жазады Anmyqtime.kz

Маманның айтуынша, көп адамдар бұл жағдайды қалқанша безінің бұзылуымен байланыстырады. Алайда тәжірибе көрсеткендей, көбіне себебі басқа – метаболизмнің төмендеуі, яғни зат алмасу процесінің баяулауында.

Дәрігердің сөзінше, бұл, өз кезегінде, жас ұлғайған сайын адамның бұлшықет массасының азаюымен тығыз байланысты.

"Бұлшықеттер – ең көп энергия тұтынатын мүше, онда ең көп калория жағылады. Демек, бұлшықет массасы неғұрлым көп болса, калория соғұрлым жақсы жағылады. Ал бұлшықет массасы азайған сайын, бұл процесс те нашарлайды. Бұлшықет массасының деңгейін сақтауға әсер ететін гормондар – соматотропин (өсу гормоны) және жыныстық гормондар, әсіресе тестостерон ерекше рөл атқарады", – деп түсіндірді Михалева.

Сондықтан да, ерлерде тестостерон деңгейі әйелдерге қарағанда әлдеқайда жоғары болғандықтан, семіздікке бейімділігі төмен әрі арықтау да олар үшін оңайырақ болады – өйткені олардың бұлшықет массасы жоғарырақ.

"Белгілі болғандай, жас ұлғайған сайын әртүрлі гормондардың бөлінуі азаяды. Әйелдер мен ерлерде бұл процесс әртүрлі және түрлі жаста жүреді. Мысалы, өсу гормонының бөлінуі 30 жастан бастап-ақ төмендей бастайды", – дейді дәрігер.

Әрине, бұлшықет массасын қалыпты деңгейде сақтау ең алдымен физикалық белсенділікке байланысты. Михалева өкінішпен атап өткендей, бүгінде халықтың 70%-дан астамы, тіпті 90%-ға жуығы, гиподинамиядан – яғни төмен физикалық белсенділіктен зардап шегуде. Бұл әсіресе егде жастағы адамдарға тән.

"Газета.ru" басылымының хабарлауынша, дәрігердің пікірінше, артық салмақтың жиналуын әйелдер де, ерлер де болдырмауға болады. Ол үшін тек өмір салтына, тамақтануға мән беріп, физикалық белсенділік деңгейін сақтау қажет.

"Барлық жас санатында бұлшықет массасын қалыпты ұстау үшін базалық деңгейдегі қозғалыс қажет. Бұл – көп айтылатын күніне 10 мың қадам, оған қоса аптасына кем дегенде 150 минут орташа немесе жоғары қарқынмен жаттығу жасау керек. Сонымен қатар, 40 жастан кейін тамақтың калориялылығын күніне 100 ккал-ға азайту керек, ал 50–55 жастан бастап тағы 100 ккал-ға төмендету қажет. Яғни жас кезбен салыстырғанда жалпы 200 ккал-ға аз тұтыну керек, себебі жастың ұлғаюымен ағзаның калорияға деген қажеттілігі де азаяды", – деді Оксана Михалева.