Шілде айында ауа райы қандай болады?

2025 жылдың шілде айында Қазақстанның көп бөлігінде температура қалыптыдан жоғары деңгейде болады. Бұл туралы «Қазгидрометтің» айлық консультативтік болжамында көрсетілген. Айдың бірінші онкүндігінен бастап-ақ республикамыздың оңтүстік-батысында 40 градустан асатын аптап ыстық байқалады, деп хабарлайды Anyqtime.kz.

Орташа температура 

Метеорологтардың мәліметінше, шілде айында еліміздің батысындағы облыстарда – Батыс Қазақстан, Атырау, Маңғыстау өңірлерінде, сондай-ақ Түркістан, Қызылорда, Жамбыл және Алматы облыстарының оңтүстік бөліктерінде ауа температурасы қалыптыдан +1°С-қа жоғары болады. Бұл аймақтарда түнгі температура +22+28°С, ал күндізгі температура +38+44°С-қа дейін көтеріледі.

Еліміздің қалған аймақтарында орташа температура +18+25°С шамасында, ал шығыс пен оңтүстік-шығыс таулы өңірлерінде +14+17°С деңгейінде болады.

Жауын-шашын мөлшері

Шілде айында жауын-шашынның таралуы өңірлерге қарай қатты ерекшеленеді. Солтүстік пен шығыс облыстарда жаңбыр мөлшері нормадан жоғары күтілсе (әсіресе Қостанайдың солтүстік-батысында және Павлодар, ШҚО, СҚО аумақтарында), оңтүстік пен батыс өңірлерде керісінше, жауын-шашын мөлшері аз болады.

Мысалы, Кызылорда облысында жауын-шашын мөлшері небәрі 3-8 мм шамасында, ал Алматы мен Жетісу облыстарының таулы бөліктерінде бұл көрсеткіш 80 мм-ге дейін жетеді.

Атмосфералық құбылыстар 

Көптеген аймақтарда шілде бойы найзағай, өткінші жаңбыр, күшті жел (15-20 м/с), кей жерлерде бұршақ пен шаңды дауыл болжануда. Әсіресе Атырау, Маңғыстау, Қызылорда, Түркістан және Жамбыл облыстарында ауа райы күрт өзгеруі мүмкін.

Солтүстік облыстарда тіпті түнгі уақытта температура +5°С-қа дейін төмендеп, күндіз +35°С-қа дейін көтерілуі ықтимал.

Жалпы болжам

Қорыта айтқанда, 2025 жылғы шілде айы Қазақстанның көп бөлігінде ыстық әрі құрғақ болады. Бұл ауыл шаруашылығына әсер етуі мүмкін, сондықтан мамандар аграрлық сектордағы жұмысшыларды суаруға, егістікті қорғауға алдын ала дайын болуға шақырады.

Шілденің басынан бастап ауа райына байланысты құбылыстар жиілейді, ал ай соңында күн қатты ысуы мүмкін. Осыған байланысты тұрғындарға күннен қорғануға, денсаулыққа сақ болуға және ауа райы болжамдарын тұрақты түрде бақылауға кеңес беріледі.