Ғани Бейсембаев білім саласында елеулі өзгерістер болатынын меңзеді

Жаңа оқу жылына қатысты нақты жаңалықтар 17 тамызда өтетін республикалық Тамыз конференциясында жарияланбақ, деп хабарлайды Anyqtime.kz.

Оқу-ағарту министрі Ғани Бейсембаев Парламент палаталарының бірлескен отырысынан кейін журналистердің сауалына жауап беріп, алдағы өзгерістерге қатысты пікір білдірді. Оның айтуынша, қазіргі таңда сарапшылар қауымымен кеңес жүріп жатыр.

– Жаңа оқу жылында ешқандай пән қысқартылмайды. Бірақ білім мазмұнына қатысты сараптамалық жұмыстар жалғасып жатыр. Барлық нақты шешімдерді биылғы 17 тамызда өтетін дәстүрлі Тамыз конференциясында жариялаймыз, – деді министр.

Ғани Бейсембаевтың айтуынша, ұсынылып жатқан өзгерістер әлі де талқылану үстінде. Сондықтан қандай да бір нақты шешім туралы айту ертерек.