«Тұмшаланып» киінуге заңмен тыйым салынды: Тоқаев қол қойды

Қазақстанда қоғамдық орындарда бетті жауып тұратын киім киюге ресми түрде тыйым салынды, деп хабарлайды Anyqtime.kz.

Бұл тыйымды заң жүзінде бекітетін құжатқа бүгін Мемлекет басшысы Қасым-Жомарт Тоқаев қол қойды. Енді ел аумағындағы қоғамдық орындарда адамның бет-жүзін тануға кедергі келтіретін киімді киюге жол берілмейді. Мұндай шара құқықбұзушылықтың алдын алу және қоғамдық қауіпсіздікті күшейту мақсатында енгізіліп отыр.

Сонымен қатар, бірқатар ерекше жағдайларда бұл талап қолданылмайды. Атап айтқанда:

• Қазақстан заңдарын орындау кезінде;
• Қызметтік немесе еңбек міндетін атқару барысында;
• Медициналық себептермен;
• Азаматтық қорғаныс жағдайларында;
• Қолайсыз ауа райына байланысты;
• Спорттық, бұқаралық және мәдени шаралар кезінде.

Жаңа талаптар «Құқық бұзушылықтың алдын алу туралы» заңға енгізілген өзгерістер аясында заңдастырылды.

Бұған дейін, маусымның 10-ында Сенатта осы мәселеге қатысты түзету ұсынылған болатын. Онда қоғамдық орындарда адамның бет-жүзін тануға кедергі келтіретін киімге шектеу енгізу жөніндегі бастама жұмыс тобының отырысында қаралған еді.