Хоббиден әлемдік рекордқа дейін: қазақстандық Гиннес рекордтар кітабына кіруді үміттенеді

Ерболат Қуанышев асық жинайды, бұл – ірі қара малдың тізе буынының сүйегі. Қазіргі таңда оның коллекциясында 3 000-нан астам асық бар. Ол өз рекордын тіркеп, қажетті құжаттарды тапсырды. Оның өтініші Лондонда орналасқан бас кеңседе қаралуда, деп хабарлайды Anyqtime.kz тілшісі.

Ерболат Қуанышев Ақтөбе облысында тұрып, еңбек етеді. Оның жеке шаруа қожалығы бар. Aсықты жинауды ол 13 жыл бұрын бастаған. Ол Қазақстанның рекордтар кітабына енген және оған сәйкес сертификат пен медаль табысталған. Ерболат мырза мойындайтыны – бұрын асықтарды өз күшімен жинаған болса, қазір алыстағы аудандар мен ауылдарға барып, ең көп мөлшерде асық жинауға тырысады. Ол кәдімгі қошқар асықтарын жинау оңай екенін, ал топай-асықтарды жинап, коллекцияға қосу әлдеқайда қиын екенін айтады.

Шынында да, бұл көп қажырлы еңбекті талап етеді. Сүйекті алғаннан кейін оны 40-50 күн мұздатқышта сақтау керек, сосын суға қайнатып, жақсылап сүрту қажет, кейін күннің астында кептіріп, тек содан соң топай-асық дайын болады. Ерболат Қуанышев өз коллекциясын шеберханаға айналдырған. Бұл орын музейге ұқсайды, мұнда тек асықтар ғана емес, қазақтың ұлттық мәдениетіне қатысты басқа да заттар қойылған.

Коллекция жинау Ерболат Қуанышев үшін жай хобби емес, нағыз құмарлық, ұрпақтарды біріктіру және ұлттық мәдени мұраны сақтау тәсілі. «Қазіргі балалар асық ойнауды аз ұнатады, көбісі телефон мен компьютер алдында отырады. Ал біздің балалық шағымызда асық ең танымал ойындардың бірі болды. Асық ойыны көзді жақсартады, математикалық ойлауды дамытады, шыдамдылықты арттырады, қолдың моторикасын, шапшаңдық пен қозғалыстар үйлесімін жетілдіреді. Әркім алты метрден асықты дәлдеп атып түсіре бермейді. Бұл үшін жылдамдық пен дәлдік керек. Балаларды осы ойынға қызықтыру қажет. Бұл қазақтың ұлттық ойыны, ұрпақтан ұрпаққа жеткен. Қазіргі балалар қайтадан асық ойнаса деп армандаймын», – деді Ерболат Қуанышев.

Қазір Ерболат Қуанышев әлемдік Гиннес рекордтар кітабына енуге үмітті. Ол хат жазып, барлық құжаттарды қоса тіркеп, видео түсірген. Қазір өтініші Лондонда қаралуда. Қолданыстағы коллекциясында 3 512 асық бар. Ер адам бұған дейін әлемде осынша асық жинағандар болған ба, білмейді, бірақ өзінің коллекциясы назар аударуға тұрарлық деп есептейді.

Енді ол 10 000 асық жинауды мақсат етуде. Болашақта одан төрт метрлік алып асық мүсінін жасап, «Асығыңыз алшысынан түссін» деген жазумен туған жеріне сыйға тартпақ.