Қарлығашқа қиянат жасамаған Асқарға жұмыс табылды

Батыс Қазақстан облысында қарлығаштың ұясын таптамай, ар-ұжданын таңдаған жұмысшы жұрттың жүрегін елжіретті. Ол жұмыстан кетуге мәжбүр болса да, табиғатқа жанашырлық танытты. Бұл әрекетіне риза болған журналист оны жұмысқа шақырды, деп хабарлайды Anyqtime.kz тілшісі Taulik.kz сайтына сілтеме жасап.

Ұя үстіндегі өмір мен ар-ұждан таңдауы

30 маусым күні Асқар есімді жүк тиегіш операторға траншеяны топырақпен көму тапсырмасы беріледі. Бұл траншея газ құбырын тартуға арналған еді. Алайда жұмысты бастаған сәтте ол ішінде ұя салып, балапан өргізіп отырған бірнеше қарлығашты байқайды. Ұяларды таптап өтудің орнына, Асқар жұмысты тоқтатуға бел байлайды.

— Мен оларды басып кете алмадым. Бұл — тіршілік иесі. Олар да біз сияқты өмір сүріп жатыр, — дейді ол.

Тіршілікке деген жанашырлық пен өкініш

Асқар өзінің бұл шешімінің жұмыс берушіге ұнамайтынын түсінсе де, ар-ұжданын сатпай, сол күні-ақ өз еркімен жұмыстан кетеді. Алайда көп ұзамай оның орнына келген жұмысшылар траншеяны көміп, ұяларды жойып жібереді. Бұл жайт Асқарға ауыр тиіп, өзін кінәлі сезінгенін айтады.

— Бұл маған үлкен соққы болды. Ұзақ уақыт бойы өзімді кінәлі сезіндім. Ақыры денсаулығым сыр беріп, ауырып қалдым, — дейді ол.

Қоғам қолдауы мен жаңа мүмкіндік

Асқардың әрекеті әлеуметтік желіде таралып, жұрттың ыстық ықыласына бөленді. Белгілі журналист Нұрсейіт Жылқышыбай Instagram парақшасында оның ерлігін жоғары бағалап, жұмыс ұсынатынын мәлімдеді.

— Бауырым, нағыз ерсіз! Жұмыстан шығарып жатса, мен сізді жұмысқа аламын, — деп жазып, байланыс нөмірін де қалдырған.

Қоғам не деді?

Желі қолданушылары Асқардың бұл қадамын батылдық пен адамгершілік деп бағалап, жылы пікірлерін жазып жатыр. Көпшілік мұндай азаматтардың көп болуын тілеп, оның табиғатты қорғау жолындағы әрекетіне алғыс білдіруде.