Бельгиялық Жәнібектің ісін марқұм Шерзаттың адвокаты қолға алды

Бельгиялық отбасы асырап алған Жәнібек – шын есімі Мұрат Савелиевке қатысты даулы істі енді белгілі заңгер, марқұм Шерзаттың қорғаушысы болған Мейірман Шекеев жүргізетін болды. Бұл туралы журналист Қымбат Досжан өзінің парақшасында мәлім етті, деп хабарлайды Anyqtime.kz тілшісі.

Іс бар, нәтиже жоқ: 2024 жылдан бері қозғалған іс сотқа жетпей отыр

2024 жылдың 31 қаңтарында Арқалық қаласының полиция басқармасы ҚР Қылмыстық кодексінің 135-бабы, 3-бөлігімен («Кәмелетке толмағандар саудасы») қылмыстық іс қозғаған. Мұрат Савелиевтің шетелге, нақты айтқанда Бельгияға асырап алуға заңсыз берілгені қоғамда қызу талқыланған еді. Алайда арада бір жарым жылға жуық уақыт өтсе де, іс сотқа жетпеген.

Қымбат Досжан 2025 жылғы 9 маусымда шығарылған процессуалдық шешімдерден соң ғана кей деректер белгілі болғанын айтады. Оның сөзінше, бұл іс аясында көптеген азаматтан ДНҚ үлгілері алынған, олар Жәнібектің биоматериалымен салыстырылған. Тергеу барысында сұралған тұлғалардың ішінде 12 мың доллар алып, Жәнібекті шетелдік отбасыға бергені айтылған адам да болған. Бірақ ол күдікті ретінде емес, куә ретінде ғана танылып отыр.

Балалар үйі мен перзентхана қызметкерлерінің әрекеті сұрақ тудырады

Журналист бұл оқиғада тек делдалдар ғана емес, мемлекеттік мекемелердің де жауапкершілігі бар екенін алға тартты. Оның айтуынша, перзентхана мен балалар үйі басшылығы өз міндетіне салғырт қарап, бала құқығын қорғауда заң талаптарын орындамаған. Сондықтан бұл мекемелер де тергеу нысанасына алынуы тиіс.

Сонымен бірге, Жәнібектің биологиялық ата-анасын анықтау – негізгі міндеттердің бірі. Қымбат Досжан қазіргі таңда әкесі болуы мүмкін азаматтың ұлынан қан алынып, ДНҚ сараптамасы жасалуы қажет екенін атап өтті. Бұл әрекет шындыққа бір қадам жақындата түсуі мүмкін.

Қымбат Досжан күресті жалғыз жүргізіп келген

Журналист Қымбат Досжан бұл іске соңғы бірнеше жылдан бері назар аударып, қоғамдық резонанс тудырып жүрген тұлға. Ол өзін Жәнібектің ресми өкілі ретінде танытып, осы күнге дейін істі жалғыз өзі зерттеп, құжат жинап, түрлі инстанцияларға хат жазып келгенін айтты.

Алайда тергеу барысындағы құпиялылық ережелері журналистің істі егжей-тегжейлі жария етуіне кедергі болған.

«Көп нәрсені ашық айта алмадым. Себебі жәбірленушінің ресми өкілі ретінде белгілі мән-жайларды құпия сақтау міндеті жүктелген», – дейді ол.

Халық заңгерінің араласуы – істің жаңа кезеңі

Жаңа кезең – заңгер Мейірман Шекеевтің іске қосылуымен басталмақ. Ол бұған дейін марқұм Шерзаттың ісімен айналысқан тәжірибелі адвокат ретінде танылған. Қымбат Досжан Халық заңгерінің бұл іске араласуы әділеттіліктің орнауына жол ашады деген үмітте.

«Білімді, білікті заңгермен бірлесіп, бұл істің күрмеуін шешеміз деген сенім бар. Ендігі ресми ақпаратты тек менің, Жәнібектің және Мейірман Қалмаханұлының парақшасынан ғана алуға болады», – деді журналист.

Ол Мейірман Шекеевтің ұсынысты қабыл алғанына ризашылығын білдіріп, алдағы күрделі процесте сәттілік тіледі.

Жәнібектің тағдырын сатып жіберген кім?

Қоғамда қызу талқыланып жатқан сауал – Жәнібек қандай жолмен Бельгияға кеткен? Кімнің қолы бар? 12 мың долларды кім, не үшін алды? Бұл сұрақтарға әлі нақты жауап жоқ. Әзірге тергеу органдары оны тек куә ретінде қарастыруда.

Бірақ бала саудасы секілді ауыр қылмыстың ашылмауы, ал жауапты тұлғалардың әлі күнге дейін жауапқа тартылмауы қоғамда ашу мен реніш тудырып отыр.

Жәнібек – жай ғана бала емес, бүгінгі Қазақстандағы жүйенің бейнесі іспетті. Бұл оқиғада тек бір адамның емес, тұтас бір жүйенің салғырттығы, немқұрайлылығы мен заңсыз әрекеттері әшкере болуы мүмкін.