Техаста су тасқыны салдарынан қаза тапқандар саны 82-ге жетті

Anyqtime.kz хабарлағандай, Техас билігі су тасқыны салдарынан қаза тапқандар саны 82 адамға жеткенін мәлімдеді. Сонымен қатар, сейсмологтар алдағы уақытта жауын-шашынның күтілетінін ескертіп отыр.

CNN телеарнасының сюжетінде атап өтілгендей, Керр округінде қаза тапқандардың арасында кем дегенде 28 бала бар. Сонымен қатар, жалпы құрбандар саны өсуі мүмкін, өйткені штат бойынша төтенше жағдай қызметтері іздестіру-құтқару және қалпына келтіру жұмыстарын жалғастырып жатыр.

Жексенбі күні кешке қарай Техастағы су тасқыны салдарынан 50 адамның қаза тапқаны тіркелді. Олардың көпшілігі Керр округінде табылған, Трэвис округінде – алты адам, Бернет округінде – үш адам, Кендалл және Уильямсон округтерінде – екі адамнан, ал Том-Грин округінде бір адам көз жұмған.

Билік өкілдерінің айтуынша, Camp Mystic лагерінен он қыз бала мен бір жетекші әлі күнге дейін хабар-ошарсыз жоғалғандар қатарында. Техас губернаторы Грег Эбботттың айтуынша, кенеттен болатын су тасқындары штаттың кейбір аймақтары үшін қауіп төндіріп отыр, алдағы күндері жауын-шашын жалғасады деп күтілуде. Билік Керр округіндегі Хант қауымдастығының тұрғындарын 7 шілде күні биік жерлерге көшуге шақырды.

Көптеген қирауларға себеп болған Керр округіндегі су тасқыны 2025 жылдың 4 шілдесінде орын алған. Аталған өңірде төтенше жағдай жарияланды.

2025 жылдың 6 шілдесінде Қазақстан Президенті Қасым-Жомарт Тоқаев АҚШ Президенті Дональд Трамптың атына көңіл айту жеделхатын жолдады.