Қазақстан құрамасы FIFA рейтингінде құлдырады!

10 шілдеде Халықаралық футбол федерациясы (FIFA) ұлттық құрамалардың жаңартылған рейтингін жариялады, деп хабарлайды Anyqtime.kz.

Жаңа рейтингке сәйкес, Қазақстан құрамасы бір сатыға төмендеп, 114-орынға жайғасты.

Али Алиевтің шәкірттері FIFA-ның жаңа классификациясында 1165.49 ұпай жинаған. Бұған дейін отандастарымыздың еншісінде 1177.66 балл болған еді.

Әлемдік рейтингтің көшбасшылары өзгеріссіз қалды – алғашқы орында 2022 жылғы әлем чемпиондары Аргентина (1885.36). Одан кейінгі орындарда:

• Испания – 1867.09,
• Франция – 1862.03,
• Англия – 1813.32,
• Бразилия – 1777.69.

Келесі үздік бестікке жақында ғана УЕФА Ұлттар Лигасын жеңіп алған Португалия (1770.53) бастау беріп тұр. Одан кейін:

• Нидерланд – 1758.18,
• Бельгия – 1736.38,
• Германия – 1716.98,
• Хорватия – 1707.51.

Осы арада айта кетейік, кеше екі қазақстандық футбол клубы жаңа еурокубок маусымындағы алғашқы матчтарын өткізді:

"Ордабасы" сырт алаңда Грузияның "Торпедо" клубына 3:4 есебімен жол берді.

Ал "Актобе" Польшаның "Легия" командасына 0:1 есебімен жеңілді.

Бұл қос қарсыласумен өтетін қарымта матчтар 17 шілдеде Қазақстанда өтеді.